वैद्यकीय विद्यार्थ्यांच्या मानसिक आरोग्याबाबत सर्वेक्षण

सकाळ वृत्तसेवा
मुंबई, ता. १ : वैद्यकीय महाविद्यालयात विद्यार्थ्यांना रॅगिंग, अभ्यासाचा ताण, घरापासून दूर राहणे अशा अनेक समस्यांना तोंड द्यावे लागते. अशा परिस्थितीत वैद्यकीय विद्यार्थ्यांचे रॅगिंग रोखण्यासाठी राष्ट्रीय वैद्यकीय विज्ञान आयोगाने वेळोवेळी महत्त्वाची पावले उचलली आहेत. याच क्रमाने आयोगाने आता विद्यार्थ्यांचे मानसिक आरोग्य जाणून घेण्यासाठी सर्वेक्षण करण्याचा निर्णय घेतला आहे.

देशातील वैद्यकीय महाविद्यालयांमधील विद्यार्थ्यांचे रॅगिंग रोखण्यासाठी राष्ट्रीय वैद्यकीय आयोग अनेक प्रयत्न करत आहे. यासाठी आयोगाने सर्व वैद्यकीय महाविद्यालयांमध्ये अँटी रॅगिंग सेलची स्थापना केली आहे. अँटी रॅगिंग सेलने वैद्यकीय महाविद्यालयातील विद्यार्थ्यांचे मानसिक आरोग्य जाणून घेण्याचे ठरवले आहे. याअंतर्गत अँटी रॅगिंग सेलने यासाठी राष्ट्रीय कृती दलाची स्थापना केली आहे. या कृती दलाच्या माध्यमातून वैद्यकीय विद्यार्थ्यांचे तसेच वैद्यकीय महाविद्यालयातील प्राध्यापकांचे ऑनलाइन मानसिक आरोग्य सर्वेक्षण केले जाणार आहे. या सर्वेक्षणात सहभागी विद्यार्थी आणि प्राध्यापकांची ओळख आणि त्यांनी दिलेली माहिती गोपनीय ठेवण्यात येणार आहे.

अहवाल तयार करण्यासाठीच सर्वेक्षण
नॅशनल मेडिकल कमिशनने स्पष्ट केले आहे की, सर्वेक्षणात मिळालेली माहिती केवळ विश्लेषण आणि अहवाल तयार करण्यासाठी आवश्यक शिफारशींसाठी वापरली जाईल. ऑनलाइन सर्वेक्षण करण्यासाठी राष्ट्रीय वैद्यकीय विज्ञान आयोगाने गुगल लिंक तयार केली आहे. ही लिंक देशातील सर्व वैद्यकीय महाविद्यालयातील विद्यार्थी आणि प्राध्यापकांना पाठवली जाईल. याशिवाय आयोगाच्या वेबसाइटवरही ही लिंक उपलब्ध करून देण्यात आली आहे. विद्यार्थी आणि प्राध्यापकांनी ३ मे २०२४ पर्यंत या सर्वेक्षणात सहभागी व्हावे, असे नॅशनल मेडिकल कमिशनने सुचवले आहे.