घाटकोपरमध्ये सोन्याची बिस्किटे सापडल्याची अफवा

घाटकोपरमध्ये सोन्याची बिस्किटे सापडल्याची अफवा

मुंबई, ता. ११ : लोकसभा सार्वत्रिक निवडणूक प्रक्रिया सुरू असल्याने मुंबई उपनगर जिल्हा निवडणूक यंत्रणेमार्फत आदर्श आचारसंहितेची प्रभावी अंमलबजावणी करण्यात येत आहे. यासाठी विविध ठिकाणी पथकांमार्फत तपासणी करण्यात येत आहे. या तपासणीदरम्यान घाटकोपर येथे एसएसटी निरीक्षण पथकाने एका वाहनाची तपासणी केली. यामध्ये प्रचारसाहित्याचे बॉक्स होते. त्याची तपासणी करताना प्रचारसाहित्यासोबत सोन्याचे बिस्कीट असल्याचे ध्वनिचित्रफित सोशल मीडियावर प्रसारित झाले आहे. मात्र, याबाबत पोलिसांनी आणि संबंधित पथकाने बॉक्स तपासले असता त्यात प्रचारसाहित्य वगळता काहीही आढळून आले नसल्याचे स्पष्ट केले आहे. या तपासणीवेळी तेथे उपस्थितांनी वेगळा उल्लेख केल्याने हा प्रकार व्हायरल केला गेला असल्याचे आढळून आले. मात्र, यामध्ये कोणत्याही बाबींची सत्यता पडताळूनच वापरकर्त्यांनी सोशल मीडियाचा योग्य पद्धतीने वापर करावा, असे आवाहन करण्यात आले आहे.
विशेषत: निवडणूक काळात कोणत्याही बाबींची खातरजमा झाल्याशिवाय आणि त्याची सत्यता पटल्याशिवाय सोशल मीडियावर अशाप्रकारे ध्वनिचित्रफित अथवा कोणताही मजकूर कोणीही शेअर करू नये अथवा फॉरवर्ड करण्यात येऊ नये, असे निवडणूक प्रशासनाने स्पष्ट केले. यासंदर्भात उल्लंघन झाल्याचे आढळून आल्यास सायबर सुरक्षा कायद्यांतर्गत संबंधितांवर गुन्हा दाखल करण्यात येईल, असे मुंबई उपनगर जिल्हा निवडणूक प्रशासनाने कळविले आहे.