मलनिस्सारण वाहिन्या तुडुंब

सकाळ वृत्तसेवा
मुंबई, ता. २३ : पावसाळा तोंडावर आल्याने आता नालेसफाईच्या कामांकडे सर्वांचे लक्ष लागले आहे. नालेसफाईचे काम वेळेत होत असल्याचा दावा पालिका प्रशासनाने केला असला तरी नालेसफाईबाबत अनेक तक्रारी आता येऊ लागल्या आहेत. तसेच शहरात अनेक ठिकाणी मलनिस्सारण वाहिन्यांमधील सांडपाणी रस्त्यांवर येत आहे. यामुळे पालिकेच्या नालेसफाईच्या दाव्यावर प्रश्नचिन्ह निर्माण झाले आहे.
आनंद नगरमध्ये एका आठवड्यापासून मुख्य रस्त्यावरील बँक ऑफ बडोदाच्या समोरच्या बाजूला मलनिस्सारण वाहिनीचे मुख्य चेंबर चोकप झाले असून त्यातून सांडपाणी परिसरात बाहेर वाहत आहे. त्याचा त्रास पादचाऱ्यांसह स्थानिक रहिवाशांना होत आहे. तसेच दरवर्षी पावसाळ्यात आनंद नगर परिसर जलमय होत असतो. येथे कंबरेपर्यंत पाणी साचते. यामुळे येथील वसाहतींतील इमारतीच्या तळमजल्यावरील दुकानदार आणि राहणाऱ्या लोकांना मोठा त्रास सहन करावा लागतो. यामुळे आनंद नगर परिसरातील मुख्य रस्त्यावरच्या आणि मेट्रोस्थानकांजवळील मलनिस्सारण वाहिन्यांची तातडीने सफाई करण्याची गरज आहे, अन्यथा आनंद नगर आणि उड्डाण पुलाच्या आसपासच्या इमारतींत पावसाळ्यात पूरस्थिती निर्माण होण्याची भीती व्यक्त होत आहे.
काम न झाल्यास स्थानिक रहिवासी ‘रास्ता रोको’ आंदोलन करण्याच्या तयारीत आहेत, अशी माहिती सामाजिक कार्यकर्ता राजेश पंड्या यांनी दिली आहे.

अधिकृत आकडे जाहीर करा
महापालिकेचे माजी विरोधी पक्षनेते रवी राजा यांनीदेखील नालेसफाईवरून पालिका प्रशानावर टीका केली आहे. मुंबईत नालेसफाईची कामे नक्की किती झाली आहेत, याबद्दलची कुठलीही अधिकृत माहिती महापालिका प्रशासनाने दिलेली नाही. तसे पाहिले तर आतापर्यंत फक्त ४५ ते ५० टक्के कामे झाली आहेत. मान्सून अवघ्या काही महिन्यांवर येऊन ठेपला आहे, अशा परिस्थितीत ही कामे कधी पूर्ण होणार, असा प्रश्‍न उपस्थित होत आहे. त्यामुळे प्रशासकांनी नालेसफाईची अधिकृत आकडेवारी जाहीर करायला हवी, अशी मागणीही त्यांनी केली आहे.
..........................