अकरावीची ऑनलाईन प्रवेश प्रक्रिया आजपासून

अकरावीची ऑनलाईन प्रवेश प्रक्रिया आजपासून
पहिल्या टप्प्याची नोंदणी सुरू; रिक्त जागांसाठी आधी नियोजन

आजपासून अकरावीच्या प्रवेशासाठी पहिल्या टप्प्याची नोंदणी
मुंबई, ता. २३ : मुंबई महानगर क्षेत्रासह पुणे, नाशिक, अमरावती, नागपूर या महापालिका क्षेत्रातील कनिष्ठ महाविद्यालयांमध्ये अकरावीच्या ऑनलाईन प्रवेश प्रक्रियेला शुक्रवारी २४ मेपासून सुरुवात होत आहे. यामध्ये विद्यार्थ्यांना पहिल्या टप्प्यासाठी नोंदणी करता येणार असून यासाठी मागील दोन दिवसांत विद्यार्थ्यांना सरावासाठी डमी लॉगीन उपलब्ध करून देण्यात आले होते, त्याला मुंबई महानगर क्षेत्रात मोठा प्रतिसादही मिळाला आहे.
मुंबई महानगर क्षेत्रात मागील वर्षी केंद्रीय ऑनलाईन प्रवेशासाठी २ हजार ३८५ कनिष्ठ महाविद्यालयांमध्ये ३ लाख ८९ हजार ६७५ जागा उपलब्ध होत्या. त्यापैकी २ लाख ६७ हजार ८६२ जागांवर म्हणजेच केवळ ६९ टक्के प्रवेश झाले; तर उर्वरित १ लाख २१ हजार ८१३ जाग रिक्त राहिल्या होत्या. यंदा रिक्त राहिलेल्या जागांवर अधिकाधिक प्रवेश व्हावेत, यासाठी शिक्षण विभागाकडून नियोजन केले जाणार असल्याचे सांगण्यात आले.
अकरावीच्या प्रवेशासाठी यंदा तीन नियमित फेऱ्या, दोन विशेष फेऱ्या होणार आहेत; तर त्यानंतरही विद्यार्थ्यांना प्रवेश न मिळाल्यास विशेष आणि दैनिक गुणवत्ता फेऱ्या आयोजित केल्या जाणार असून यात एफसीएफएस ही फेरी होणार नाहीत.
प्रवेशासाठी संकेतस्थळ
अकरावीच्या ऑनलाईन प्रवेशासाठी शिक्षण मंडळाकडून
https://11thadmission.org.in/ या पोर्टलवर विद्यार्थ्यांना लॉगीन करून त्यावर आपली माहिती नोदविणे आवश्यक आहे.