अखेर मुंबईत मॉन्सून दाखल

सकाळ वृत्तसेवा
मुंबई, ता. ९ : उकाड्यामुळे हैराण झालेल्या मुंबईकरांना असलेली पावसाची प्रतीक्षा अखेर संपली आहे. मॉन्सूनचे रविवारी (ता. ९) मुंबईत आगमन झाल्याची अधिकृत माहिती प्रादेशिक हवामानशास्त्र केंद्राने दिली. अंदाजापेक्षा दोन दिवसआधीच मॉन्सूनचे आगमन झाल्याने शहरातील वातावरणात गारवा निर्माण झाला आहे.
केरळमध्ये यंदा ३० मे रोजी मॉन्सून दाखल झाला. तळकोकणात तो गुरुवारी (ता. ६) दाखल झाला होता. त्यानंतर साधारणत: ११ जूनपर्यंत मुंबईत मॉन्सूनसरी बरसण्याचा अंदाज वर्तवण्यात आला होता. काही दिवसांपासून मुंबईत पावसाचा शिडकावा सुरू होता; मात्र तो मॉन्सूनपूर्व पाऊस असल्याचे सांगण्यात आले होते. रविवारी मध्यरात्रीनंतर मुंबईत पावसाच्या हलक्या सरी कोसळल्या. शहरात रविवारीही सकाळपासून ढग दाटून आले होते; मात्र पावसाने दिवसभर पाठ फिरवल्याचे दिसले. त्यामुळे आर्द्रतेमुळे नागरिकांना घामाच्या धारांनी चिंब होण्याची वेळ आली.
---
२४ तासांत गडगडाटासह
पावसाची शक्यता!
प्रादेशिक हवामानशास्त्र केंद्राच्या अंदाजानुसार पुढील २४ तासांत साधारणपणे ढगाळ वातावरण राहणार आहे. शहर आणि उपनगरात गडगडाटासह मध्यम ते मुसळधार पावसाची शक्यता आहे. कमाल आणि किमान तापमान अनुक्रमे ३० अंश आणि २५ अंश सेल्सिअस राहण्याची शक्यता आहे.
...............