वांद्रे दंडाधिकारी न्यायालयाचा पतीला दणका

वांद्रे दंडाधिकारी न्यायालयाचा पतीला दणका
सकाळ वृत्तसेवा
मुंबई, ता. ११ : पत्नीशी काडीमोड घेतल्यानंतर तिला पोटगी देण्यास टाळाटाळ करणाऱ्या पतीला वांद्रे येथील दंडाधिकारी न्यायालयाने दणका दिला आहे. कर्जाचे हप्ते फेडणे, आई-वडिलांचा सांभाळ करणे अशी कारणे सांगून पती विभक्त पत्नीला पोटगी देण्याची जबाबदारी झटकू शकत नाही, असे स्पष्ट करत वांद्रे दंडाधिकारी न्यायालयाने पत्नीला पोटगी मंजूर केली.

लग्नाच्या काही दिवसांनंतर छोट्या-छोट्या कारणांवरून विवाहितेला सासरच्या मंडळींनी त्रास द्यायला सुरुवात केली. माहेरहून ३ लाख रुपये घेऊन ये, असा तगादा तिच्याकडे लावला. पैसे आणले नाही म्हणून तिला टोमणे मारले; तसेच तिचा शारीरिक छळ केला. सासरच्या या जाचाला कंटाळून माहेरी राहणाऱ्या विवाहितेने अखेर पती व सासू-सासऱ्यांविरुद्ध वांद्रे दंडाधिकारी न्यायालयात धाव घेतली. तसेच विवाहितेने कौटुंबिक हिंसाचार कायद्यांतर्गत संरक्षण व पोटगीची मागणी केली; मात्र पतीने तिचा दावा फेटाळून लावला. आई-वडिलांचा सांभाळ करतो; तसेच कर्जाचे हप्ते फेडतो. त्यामुळे पोटगी देऊ शकत नाही, असा दावा पतीने दंडाधिकारी न्यायालयात केला. दंडाधिकारी न्यायालयाने दोन्ही बाजूंकडील युक्तिवाद ऐकून घेत पतीचा दावा फेटाळून लावत अर्जदार पत्नीला दरमहा ४ हजार रुपयांची पोटगी देण्याचे निर्देश पतीला दिले.