बेकायदा वीजजोडणी खंडित

बेकायदा वीजजोडणी खंडित

सकाळ वृत्तसेवा
मुंबई, ता. ४ : अनधिकृतरीत्या वीजजोडणी घेऊन रस्त्यावर व्यवसाय करणाऱ्या फेरीवाल्यांविरोधात महापालिका, बेस्ट आणि वीज कंपनीकडून संयुक्त कारवाई करण्यात येत आहे. याच अनुषंगाने गुरुवारी दादर रेल्वे स्थानक परिसर, भायखळा, चेंबूर, बोरिवली, मुलुंड आणि अंधेरी परिसरातील अनधिकृत वीजजोडण्या खंडित करण्यात आल्या आहेत. तसेच फेरीवाल्यांची साधनसामुग्रीही जप्त करण्यात आली.
उच्च न्यायालयाच्या निर्देशानुसार, अनधिकृत फेरीवाले, बेवारस वाहने, पदपथावरील अतिक्रमणे यावर अधिक कठोर करावी, असे निर्देश महापालिका आयुक्त तथा प्रशासक भूषण गगराणी यांनी दिले आहेत. त्यानुसार अतिरिक्त महानगरपालिका आयुक्त (शहर) डॉ. अश्विनी जोशी यांच्या मार्गदर्शनाखाली अतिक्रमण निर्मूलनाची कारवाई अधिक तीव्र करण्यात आली आहे. प्रशासनाने पदपथ आणि रस्त्यांचा वापर करताना अडथळा ठरणारे फेरीवाले तसेच आरोग्यासाठी अपायकारक अशा पद्धतीने उघड्यावर अन्न पदार्थांची विक्री करणाऱ्यांविरोधात कारवाईचा बडगा उगारला आहे. या फेरीवाल्यांनी अनेक ठिकाणी व्यवसायासाठी अनधिकृतरीत्या वीजजोडणी घेतली आहे. शहर विभागात बेस्टकडून; तर उपनगरांमध्ये मे. अदाणी एनर्जी लिमिटेड या वीज कंपनीकडून वीज पुरवली जात आहे. त्यामुळे महापालिका, बेस्ट आणि वीज कंपनीच्या पथकांनी अनधिकृतरीत्या वीज जोडणीविरोधात संयुक्त कारवाई सुरू केली आहे.
-----------------------------------------------
विभागवार विशेष पथक
अनधिकृतपणे वीजचोरी करणाऱ्या व्यावसायिकांविरोधात कठोर कारवाई करण्याबाबत महापालिका प्रशासन बेस्ट उपक्रमाला पत्राद्वारे कळवणार आहे. तसेच अशा फेरीवाल्यांवर पोलिसांत गुन्हे नोंदवण्याबाबतही महापालिकेने सांगितले आहे; तर दुसरीकडे पालिकेनेदेखील सर्व विभाग कार्यालयांत सहायक अभियंत्यांचा समोवश असलेल्या पथकाची निर्मिती केली असून त्यांच्यामार्फत कठोर कारवाई केली जाणार आहे.

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com