गोविंदाच्या स्वागतासाठी पावसाची सलामी

सकाळ वृत्तसेवा
मुंबई, ता. २७ ः चार-पाच दिवसांपासून मुंबईत पावसाचा जोर होता; मात्र सोमवारपासून पावसाचा जोर कमी झाला असला, तरी हलक्या सरी मात्र बरसत आहेत. रात्रीपासून हलक्या सरींचे आगमन सुरूच असल्यामुळे गोविंदामध्येही उत्साह संचारला होता.
दहीहंडीच्या वेळी पाऊस येणे, ही गोविंदासाठी मोठी पर्वणीच असते. यामुळे आजच्या पावसाचा गोविंदांनीही आनंद घेतला. पावसाच्या सरी अंगावर झेलत त्यांनी थर लावले. मोठ्या सरींचा सामना करत आत्मविश्वासाने दहीहंडी फोडत पावसाचा मान ठेवला. पावसामुळे अनेक मैदानांमध्ये चिखल झाला होता. या चिखलामध्ये गोविंदा मोठ्या आनंदाने थिरकले. मंगळवारपासूनच कुलाबा, भायखळा, दादर, सायन, माटुंगा, चेंबूर, घाटकोपर, मालाड, बोरिवली, पवई आदी भागांत पावसाच्या हलक्या सरी बरसल्या. यामुळे संपूर्ण मुंबईतील पावसाळी वातावरण गोविदांना हवेहवेसे वाटत होते.
---------------------------------
मध्यम पाऊस पडण्याची शक्यता
कुलाबा वेधशाळेने पुढील २४ तासांसाठी वर्तविलेल्या अंदाजानुसार मुंबई शहर आणि उपनगरात सामान्यतः आकाश ढगाळ राहील आणि मध्यम ते मुसळधार पाऊस पडेल. काही वेळा ३०-४० किमी प्रतितास वेगाने वारे वाहण्याची शक्यता आहे. शहर आणि उपनगरात अंशतः ढगाळ आकाश असून मध्यम पाऊस पडण्याची शक्यता आहे.
...................................
पावसाची नोंद
गेल्या २४ तासांच पावसाने ही चांगली हजेरी लावली. कुलाबा १३.४५, वांद्रे १०.६७, बोरिवली १२.६८, भायखळा १२.४५, चेंबूर ९.९, दादर ४.८, माटुंगा १२.९४, गोरेगाव १०.१४, सायन १६.२ मिमी पावसाची नोंद झाली.