दहिसरमध्ये हिट अँड रन

दहिसरमध्ये `हिट ॲण्ड रन’
भरधाव ट्रकच्या धडकेत पादचाऱ्याचा मृत्यू

मुंबई, ता. २७ : दहिसर येथे पश्चिम द्रुतगती मार्ग ओलांडणाऱ्या पादचाऱ्यास भरधाव ट्रकने उडवले. हा अपघात सोमवारी (ता. २६) दुपारी बारा वाजण्याच्या सुमारास घडला. अपघातानंतर जखमीला वैद्यकीय मदत न देताच पळून जाण्याच्या प्रयत्नात असलेल्या ट्रकचालकास पोलिसांनी दहिसर टोल नाक्यावर ताब्यात घेतले. आरोपी ट्रकचालकाने घटनास्थळावरून पळ काढला; मात्र पुढे टोल नाक्यावर वाहतूक कोंडी असल्याने आरोपी पोलिसांच्या हाती लागला. राजदीप धादल असे ट्रकचालकाचे नाव असून त्याला अटक केल्याचे पोलिसांनी सांगितले. त्याच्या रक्ताचे नमुने चाचणीसाठी पाठविण्यात आले असून अपघात घडला तेव्हा तो दारूच्या नशेत होता का, हे या चाचणीतून स्पष्ट होईल. दरम्यान अपघातात मृत्यू झालेली व्यक्ती ४० ते ५० वयोगटातील असून अद्याप तिची ओळख पटलेली नसल्याची माहिती पोलिसांनी दिली.