वादग्रस्त अधिकाऱ्यावर अपर परिवहन आयुक्त पदाचा भार ?

भरत कळसकरांकडे आयुक्तपदाचा भार
भाराला परिवहन विभागातील अधिकाऱ्यांचा विरोध
सकाळ वृत्तसेवा
मुंबई, ता.४ : उच्च न्यायालयात खटला, एसीबी चौकशी आणि गुन्हा दाखल असल्यास पदोन्नती किंवा अतिरिक्त कार्यभार देता येत नाही. मात्र, ताडदेवचे आरटीओ आणि रस्ता सुरक्षा उपायुक्त भरत कळसकर यांच्याकडे गुरुवार (ता. २) अपर परिवहन आयुक्तपदाचा अतिरिक्त कार्यभार सोपवला आहे. मात्र, वादग्रस्त अधिकाऱ्यावर अपर परिवहन आयुक्तपदाचा भार देण्यात आला, असा आरोप मोटार वाहन निरीक्षक गजेंद्र पाटील यांनी केला आहे.
याबाबतचे पत्र त्यांनी मुख्यमंत्र्यांना पाठवले आहे. पाटील यांनी पत्रात कळसकर यांच्यावर सोपविण्यात आलेल्या अतिरिक्त अपर परिवहन आयुक्तपदाच्या कार्यभाराबाबत संताप व्यक्त केला आहे.
कळसकर यांच्याकडे ताडदेवचे आरटीओ आणि रस्ता सुरक्षा उपायुक्त पदाचा कार्यभार आहे. परंतु आता त्यांच्याकडे अपर परिवहन आयुक्त पदाचा तिसरा अतिरिक्त कार्यभार सोपविण्यात आहे. तसेच सहपरिवहन आयुक्त रस्ता सुरक्षाचाही कार्यभार देण्यात आला आहे. मात्र, त्यांच्याशिवाय इतर अधिकारी सक्षम नाहीत का? असा सवाल एका वरिष्ठ अधिकाऱ्याने केला आहे.
..
मंत्र्यांसह वरिष्ठ अधिकाऱ्यांवर तीन वर्षांपूर्वी आरोप करण्यात आले होते. त्याची आयुक्त स्तरावरच्या अधिकाऱ्याने चौकशी करण्यात आली आहे, पण त्यातून काहीही निष्पन्न झाले नाही. हे आरोप खोडसाळपणाचे आहेत.
-भरत कळसकर, अपर परिवहन आयुक्त, (अतिरिक्त कार्यभार )

..
आमच्या रेकॉर्डवर कोणतीही चौकशी प्रलंबित नाही. अतिरिक्त कार्यभार सोपवण्याचा निर्णय नियमित शासकीय कामकाजाप्रमाणे घेतला आहे.
-विवेक भिमनवार, परिवहन आयुक्त

..
ताडदेवचे आरटीओ आणि रस्ता सुरक्षा उपायुक्त भरत कळसकर यांच्यावर अतिरिक्त अपर परिवहन आयुक्तपदाचा कार्यभार सोपविण्यात आला आहे. पण हा प्रस्ताव आलेला नाही, असा परस्पर निर्णय घ्यायला नको होता. त्यांच्यावर काही आपत्कालीन परिस्थिती ओढवली का? त्यामध्ये त्यांना हा निर्णय घ्यावा लागला हे सांगता येत नाही.
- राजेंद्र होळकर, सहसचिव, परिवहन