ऐन निवडणुकीत शिक्षकांवर मूल्यमापन चाचणीचा व्याप

ऐन निवडणुकीत शिक्षकांवर
मूल्यमापन चाचणीचा व्याप
२६ नोव्हेंबरपर्यंत पोर्टलवर गुण भरण्याचे आदेश
मुंबई, ता. ११ ः राज्यातील बहुसंख्य शिक्षक विधानसभा निवडणुकीच्या कामात सहभागी झाले आहे. त्यातच जुलै महिन्यात झालेल्या संकलित मूल्यमापन-१ चाचणीचे गुण पॅट महाराष्ट्र चॅटबॉटवर आणि विद्या समीक्षा केंद्राच्या संबंधित पोर्टलवर २६ नोव्हेंबरपर्यंत नोंदविण्यासाठीचे आदेश राज्य शैक्षणिक संशोधन व प्रशिक्षण परिषदेने सोमवारी (ता. ११) दिले. त्यामुळे शिक्षकांमध्ये नाराजी व्यक्त केली जात असून निवडणुकीचे कामकाज संपल्यानंतर ही जबाबदारी सोपवावी, अशी प्रतिक्रिया शिक्षक संघटनांनी व्यक्त केली.
राज्यातील सरकारी अनुदानित शाळांमध्ये स्टार प्रकल्पांतर्गत इयत्ता तिसरी ते नववीच्या विद्यार्थ्यांसाठी नियतकालिक मूल्यांकन पॅट अंतर्गत संकलित मूल्यमापन-१ आणि संकलित मूल्यमापन-२ पायाभूत चाचणी आयोजित केली जाते. त्यातील संकलित मूल्यमापन चाचणी-१ ही २२ ते २५ जुलैदरम्यान राज्यभरातील शाळांमध्ये पार पडली. या चाचणीच्या मूल्यमापनाचे गुण विद्या समीक्षा केंद्र (व्हीएसके) यांच्यामार्फत उपलब्ध करून देण्यात आलेल्या पोर्टलवर भरण्याचे आदेश शिक्षकांना दिले आहेत.