महापरिनिर्वाण दिनाच्या सेवा सुविधांबाबत नाराजी

महापरिनिर्वाण दिनाच्या सेवासुविधांबाबत नाराजी
-अल्पोपहार, भोजनाची व्यवस्था करण्याचे आवाहन
सकाळ वृत्तसेवा
मुंबई, ता. ३ : महापरिनिर्वाण दिनानिमित्त दादर येथील चैत्यभूमीवर लाखो भीम अनुयायी डॉ. बाबासाहेब आंबेडकर यांना अभिवादन करण्यासाठी दाखल होण्यास सुरुवात झाली आहे, मात्र महापालिका प्रशासनाकडून दरवर्षीप्रमाणे सेवासुविधा ५ तारखेपासून देण्यात येणार आहेत. यामुळे बौद्धजन पंचायत समितीने तीव्र नाराजी व्यक्त केली आहे. दरवर्षी ३ डिसेंबरपासूनच भोजनासह सर्व सुविधा मिळाल्‍या पाहिजेत, अशी मागणी सामाजिक संघटनांनी केली आहे.
भीम अनुयायांनी अल्पोपहार आणि भोजनाची व्यवस्था करावी, असे आवाहन बौद्धजन पंचायत समितीने केले होते. त्‍यानुसार काही सामाजिक संघटनांनी मंगळवारपासून (ता. ३) अनुयायांसाठी भोजनाची व्यवस्‍था केली आहे.
डॉ. बाबासाहेब आंबेडकर यांना अभिवादन करण्यासाठी अनुयायी राज्‍यासह देशभरातून मुंबईत येतात. लांबचा प्रवास असल्याने अनेक अनुयायी १ डिसेंबरपासूनच छत्रपती शिवाजी महाराज मैदानात (शिवाजी पार्क) येथे दाखल होतात. असे असताना महापालिकेच्या बहुतांश सेवा ५ डिसेंबरपासून देणे सुरू केले जाते. यामुळे त्याअगोदर आलेल्या भीम अनुयायांना विविध गैरसोयींचा सामना करावा लागतो.
बौद्धजन पंचायत समितीचे कार्याध्यक्ष लक्ष्मण भगत यांनी माहिती देताना सांगितले की, भीम अनुयायांची खाण्यापिण्याची व्यवस्थित सोय केलेली दिसून येत नाही. त्यामुळे भोजनाची व्यवस्‍था करण्यासाठी पुढाकार घ्‍यावा, असे आदेश बौद्धजन पंचायत समितीचे सभापती आनंदराज आंबेडकर यांनी दिले आहेत.

सरकारच्या शपथविधीचाही फटका
नवीन सरकारचा शपथविधी गुरुवारी (ता. ५) होत आहे. त्‍यासाठी आझाद मैदानात जय्यत तयारी करण्यात येत आहे. त्‍याशिवाय येथे सुरक्षात्मक खबरदारी म्हणून मोठा पोलिस फौजफाटाही तैनात करण्यात आला आहे. त्‍यामुळे सीएसएमटी स्थानकात येणाऱ्या भीम अनुयायांचीदेखील मोठी गैरसोय होत आहे. रात्री उशिरा मुंबईत दाखल होऊन आझाद मैदानात आसरा घेणाऱ्या भीम अनुयायांना येथे थांबण्यास मज्जाव केला जात आहे. त्‍यामुळे त्यांना त्रास सहन करावा लागत आहे.

देशभरातून लाखो अनुयायी मुंबईत दाखल होण्यास सुरुवात झाली आहे. भरथंडीत त्यांची गैरसोय नको, यासाठी बौद्धजन पंचायत समितीच्या सर्व गट प्रतिनिधी, समितीअंतर्गत असलेल्या मुंबईतील सर्व शाखा पदाधिकाऱ्यांना आपापल्या सेवा तात्काळ सुरू करण्याचे आवाहन केले आहे.
- आनंदराज आंबेडकर,
सभापती, बौद्धजन पंचायत समिती