पॉस मशीन बंद पडल्याने राज्यात धान्यपुरवठा ठप्प!

पॉस मशीन बंद पडल्याने
राज्यात धान्यपुरवठा ठप्प!
अनेक गावांमध्ये नागरिकांची गैरसोय
सकाळ वृत्तसेवा
मुंबई, ता. १३ : राज्यातील विविध शहरातील स्वस्त धान्य विक्री दुकानात पॉस मशीन बंद पडल्याने धान्यवितरण ठप्प झाले आहे. त्यामुळे अन्नधान्य मिळत नसल्याने ग्राहक, तर धान्य वितरण करता येत नसल्याने विक्रेत्यांची गैरसोय होत आहे.
रेशन दुकानातील पीएसओ मशीन बंद असल्यामुळे नागरिकांना धान्य मिळणे दुरपास्त झाले आहे. तक्रार करूनही तोडगा निघत नसल्याने नागरिक मेटाकुटीला आले असून आता काय खायचे, असा प्रश्न ते विचारत आहेत. नागपुरात रेशन दुकानातील पीओएस मशीन बंद असल्याने ग्राहकांना धान्य मिळणे बंद झाले आहे. त्यामुळे ग्राहक व दुकानदार त्रस्त झाले आहेत. दुकानदाराकडे धान्याचा स्टॉक असूनही त्याचे वितरण करता येत नसल्याने दुकानात आलेल्या ग्राहकांना रिकाम्या हाताने परतावे लागत आहे. तर, ग्राहकांची गैरसोय पाहता धान्य ऑफलाइन पद्धतीने वितरण करा, अशा सूचना दुकानदारांना देण्यात आल्या आहेत; मात्र दुकानदारांमध्ये संभ्रम निर्माण झाला असून ऑफलाइन पद्धतीने धान्य वितरण केल्यास त्याचा रेकॉर्ड कसा ठेवायचा, असा प्रश्न त्यांना पडत आहे.