माती भरणीच्या कामामुळे शिवडीत प्रदूषण

माती भरणीच्या कामामुळे शिवडीत प्रदूषण
मुंबईतील सर्वाधिक प्रदूषण हे शिवडी भागामध्ये होत आहे. येथे सुरू असलेला मातीचा थराव यासाठी कारणीभूत असल्याचा आरोप शिवसेना ठाकरे गटाचे स्थानिक माजी नगरसेवक सचिन पडवळ यांनी केला आहे. प्रदूषणावर उपाययोजना करण्यासाठी महापालिकेने बोरिवली व भायखळा येथे बांधकामांवर तात्पुरती बंदी आणली. अशाच प्रकारची कारवाई शिवडीमध्ये करावी अन्यथा तीव्र आंदोलनाचा इशाराही पडवळ यांनी दिला आहे. शिवडी पूर्व, हाजी बंदर येथील मोदी स्टोन या कंपनीत दोन महिन्यांपासून दरदिवशी अंदाजे ५०० पेक्षा जास्त डंपर इतक्या मातीची भरणी केली जात आहे. महत्त्वाचे म्हणजे ही माती बीकेसी येथून वाहून आणली जात आहे. त्‍यामुळे फॉर्सबेरी रोड व हाजी बंदर रोड संपूर्ण धुळीने माखलेले आहेत. पडवळ यांनी महापालिका आयुक्त तसेच महाराष्ट्र प्रदूषण नियंत्रण मंडळाकडे रीतसर तक्रार करून कारवाईची मागणी केली आहे. हा परिसर दाट लोकवस्तीचा असून येथे सुमारे २,००० घरे आहेत.