नवोदित कलाकारांना हक्काचे व्यासपीठ

मुंबई, ता. १८ : शहराच्या मध्यवर्ती असलेले रवींद्र नाट्यमंदिर आणि पु. ल. देशपांडे कला अकादमी नव्याने नाट्यरसिकांच्या सेवेत दाखल होत आहे. या संकुलांचा उद्घाटन सोहळा मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, सार्वजनिक बांधकाम शिवेंद्रराजे भोसले, मंत्री मंगलप्रभात लोढा, खासदार अनिल देसाई, आमदार महेश सावंत यांच्या उपस्थितीत २८ फेब्रुवारीला संध्याकाळी सहा वाजता होणार आहे.
मुंबईतील सुशोभित नाट्यगृह आणि अकादमीच्या उद्घाटनासाठी सर्व मुंबईकरांना येण्याचे आमंत्रण सांस्कृतिक कार्यमंत्री ॲड. आशीष शेलार यांनी पत्रकार परिषदेतून केले. पु. ल. देशपांडे कला अकादमीच्या स्थापनेपासून अनेक कलाकार घडले आहेत. यापुढेही नवोदित कलाकारांमधील कलागुणांना प्रोत्साहन देण्याची सुविधा अकादमीमध्ये करण्यात आली आहे. त्याचबरोबर कला सादरीकरण, शिक्षण, आस्वादन, संवर्धन आणि कलाविषयक रोजगारनिर्मिती अशा बहुविध सुविधा एकाच ठिकाणी उपलब्ध होणार आहेत. कलाक्षेत्रातील २० वेगवेगळे प्रमाणपत्र, पदविका अभ्यासक्रम येथे सुरू होणार आहेत. या वेळी पु. ल. देशपांडे महाराष्ट्र कला अकादमीच्या नवीन बोधचिन्हाचेही अनावरण करण्यात आले.
-----------------------------
संकुलात अत्याधुनिक सुविधा
संकुलातील रवींद्र नाट्यमंदिर, दोन लघु नाट्यगृह आणि पाच प्रदर्शन दालने तसेच १५ तालीम दालने आहेत. त्याचबरोबर दोन्ही नाट्यगृहे नव्या रूपात, अत्याधुनिक सोयीसुविधा उपलब्ध आहेत. नाटक आणि मराठी चित्रपटांसाठी आवश्यक अशी अत्याधुनिक ध्वनी व्यवस्था व अंतर्गत सजावट करण्यात आली आहे.