गोवंडीत तेरा वर्षांच्या मुलाची भररस्त्यात हत्या

गोवंडीत तेरा वर्षांच्या मुलाची भररस्त्यात हत्या

मुंबई : बहिणीची छेड काढणाऱ्यास जाब विचारणे १३ वर्षांच्या मुर्तुझा शेख उर्फ नवाज या मुलाच्या जीवावर बेतले. छेड काढणाऱ्या सैयब अली या तरुणाने नवाजची भररस्त्यात हत्या केली. हा धक्कादायक प्रकार शनिवारी (ता.१) रात्री नऊच्या सुमारास गोवंडीच्या झाकीर हुसेन नगरात घडला. याप्रकरणी आरोपी सैयब अलीविरोधात देवनार पोलिस ठाण्यात हत्येचा गुन्हा नोंदवण्यात आला आहे. नवाजच्या बहिणीने आरोपी सैयबने छेड काढल्याची तक्रार गेल्या आठवड्यात पालकांकडे केली होती. तिचे पालक सैयबच्या घरी जाब विचारण्यासाठी गेले; मात्र तो घरी न सापडल्याने नवाजचे कुटुंबीय आपल्या घरी परतले. शनिवारी रात्री नऊच्या सुमारास नवाजने सैयबला गाठून जाब विचारला. तिथे वाद झाला आणि सैयबने नवाजला जोरात दगडावर आपटले आणि त्याच्या चेहऱ्यावर लाथा घातल्या. या हल्ल्यात नवाज गंभीर जखमी झाला. त्याला शताब्दी रुग्णालयात दाखल केले गेले, तेथे त्याचा मृत्यू झाल्याची माहिती पोलिसांनी दिली.