चेंबूरमध्ये तरुणाची हत्या

चेंबूरमध्ये तरुणाची हत्या
मुंबई, ता. १० ः चेंबूरच्या वडवली गाव परिसरात पूर्ववैमनस्यातून रविवारी मध्यरात्री विघ्नेश चांगले (वय २१) या तरुणाची हत्या करण्यात आली, तर मध्यस्थी करण्यासाठी आलेल्या त्याच्या भावावरही धारदार शस्त्राने हल्ला करण्यात आला. याप्रकरणी आरसीएफ पोलिसांनी विविध पथके तयार करून आठ संशयितांना ताब्यात घेतले.
काही दिवसांपूर्वी विघ्नेशचा वडवली गाव परिसरातीलच काही तरुणांसोबत वाद होता. रविवारी मध्यरात्री घरी परतताना या तरुणांची टोळी त्याठिकाणी मद्यपान करीत होता. विघ्नेश समोर येताच त्याच्याशी वाद घालत हाणामारी सुरू झाली. त्यात विघ्नेशवर धारदार शस्त्राने हल्ला करण्यात आला. त्याला वाचविण्यासाठी त्याचा भावाने मदत करण्याचा प्रयत्न केला असता, त्याच्यावरही वार करण्यात आले. त्यानंतर मारेकऱ्यांनी घटनास्थळावरून पळ काढला.