१७१ रुग्णांना दिड कोटी रुपयांची मदत वितरीत

१७१ रुग्णांना दीड कोटी रुपयांची मदत वितरित

सकाळ वृत्तसेवा
मुंबई, ता. ११ : मुख्यमंत्री सहाय्यता निधी व धर्मादाय रुग्णालय मदत कक्षाच्या माध्यमातून विविध आजारांवरील उपचारांसाठी गरजू रुग्णांना आर्थिक सहाय्य प्रदान केले जाते. मुख्यमंत्री देवेंद्र फडणवीस यांच्या मार्गदर्शनाखाली या कक्षाची व्यापकता वाढविण्यावर विशेष भर दिला जात आहे. याच धर्तीवर मुख्यमंत्री साहित्य निधी व धर्मादाय रुग्णालय मदत कक्षाच्या माध्यमातून सोमवारी (ता. १०) एकाच दिवशी १७१ रुग्णांना तब्बल एक कोटी ४६ लाख २० हजार रुपयांची मदत वितरित करण्यात आली असल्याची माहिती कक्ष प्रमुख रामेश्वर नाईक यांनी दिली.

वितरित करण्यात आलेल्या निधीमध्ये रस्ते अपघाताचे १७ रुग्ण, अपघात शस्त्रक्रियेचे १२ रुग्ण, मेंदूचे आजार ३५ रुग्ण, कॅन्सर केमोथेरपी किंवा रेडीएशनचे १० रुग्ण, बाल रुग्ण १०, अस्थिमज्जा प्रत्यारोपण एक रुग्ण, कर्करोगाचे दोन रुग्ण, कर्करोग शस्त्रक्रियेचे १७ रुग्ण, डायलिसिसचे पाच रुग्ण, हृदयरोगाचे १८ रुग्ण, हिप रिप्लेसमेंटचे २९ रुग्ण, मूत्रपिंड प्रत्यारोपण एक रुग्ण, गुडघा प्रत्यारोपण पाच रुग्ण, यकृत प्रत्यारोपण एक रुग्ण, नवजात बालरोग सात रुग्ण, तर विशेष प्रकरणातील एक रुग्ण अशा एकूण १७१ रुग्णांना एकाच दिवशी कक्षाच्या माध्यमातून आर्थिक मदत करण्यात आली आहे. मुख्यमंत्री सहाय्यता निधी कक्षाच्या कार्यपद्धतीत पारदर्शकता आणण्यासाठी प्राधान्य देण्यात येत आहे. या पार्श्वभूमीवर मुख्यमंत्री देवेंद्र फडणवीस यांच्या मार्गदर्शनाखाली रुग्णांना तातडीने आणि अधिकाधिक मदत मिळावी, यासाठी प्रभावी उपाययोजना राबविण्यात येत आहेत.
..
मुख्यमंत्री सहाय्यता निधीसाठी कटिबद्ध
राज्यातील कोणत्याही गरजू रुग्णाला आर्थिक अडचणींमुळे उपचारांपासून वंचित राहू द्यायचे नाही, या उद्देशाने मुख्यमंत्री सहाय्यता निधी कार्यरत आहे. भविष्यातही गरजू रुग्णांसाठी अधिक मदत आणि तत्पर सेवा पुरवण्यासाठी मुख्यमंत्री सहायता निधी कटिबद्ध राहील, असा विश्वास कक्षप्रमुख रामेश्वर नाईक यांनी व्यक्त केला.