कांदळवनाच्या प्रतिबंधित क्षेत्रात शाळा

कांदळवनाच्या प्रतिबंधित क्षेत्रात शाळा

मालकवर्गाविरोधात गुन्हा नोंद

मुंबई, ता. १२ : ट्रॉम्बे येथील चिता कॅम्प परिसरातील कांदळवनात (बफरझोन) २५ वर्षांपासून एक शाळा बेकायदा बांधल्याचा शोध अलीकडेच तहसीलदार कार्यालयास लागला. ही शाळा शासकीय मिळकतीवर आणि कांदळवनाच्या प्रतिबंधित क्षेत्रात उभी असल्याची खात्री होताच तहसीलदार कार्यालयाने पोलिस तक्रार केली आहे. त्याआधारे ट्रॉम्बे पोलिसांनी या शाळेची मालकी असलेल्या पाच व्यक्तींविरोधात वन्य संरक्षण अधिनियमानुसार गुन्हा नोंदवला.

छोटा कॅम्प येथील महसुली आणि कांदळवन क्षेत्रात ग्लोरियस नावाची शाळा बेकायदा उभी असल्याची तक्रार अयाज खान नावाच्या व्यक्तीने तहसीलदार कार्यालयात केली होती. त्याआधारे संयुक्त पाहणी केली गेली. उपलब्ध दस्त, नोंदीवरून शाळा उभी असलेला भूभाग ही शासकीय मिळकत असून कांदळवन प्रतिबंधित क्षेत्र असल्याचे स्पष्ट झाले. तहसीलदार कार्यालयाने पोलिसांच्या मदतीने या शाळेचे मालक सुगंधा जॉर्ज, एस. एडिसन, पडना राजन, अब्राहम चेलादुरी आणि एस. ख्रिस्तोफर यांची ओळख पटवली.