पूर्व व पश्चिम द्रुतगती मार्ग स्वच्छ

पूर्व व पश्चिम द्रुतगती मार्ग स्वच्छ
७९ किलोमीटरच्या रस्त्याचे पालटले रुपडे
सकाळ वृत्तसेवा
मुंबई, ता. २३ : महापालिकेच्या घनकचरा व्यवस्थापन विभागाच्या वतीने राबविण्यात आलेल्या विशेष स्वच्छता मोहिमेने पूर्व आणि पश्चिम द्रुतगती महामार्गाचे रुपडे पालटले आहे. महामार्गासोबतच सेवा रस्ते आणि बस थांबे स्वच्छ झाले. गेल्या सहा दिवसांत दररोज रात्री १० ते सकाळी सहा वाजेपर्यंत राबविलेल्या या मोहिमेत एकूण ७९ किलोमीटर अंतराच्या रस्त्यांची स्वच्छता करण्यात आली.
स्वच्छता मोहिमेत दोन्ही महामार्गांलगतचे सेवा रस्ते, उतारांची स्वच्छता, महामार्गावरील दिशादर्शक फलक, झाडांच्या बुंध्यांची व कुंपणांची स्वच्छता व रंगरंगोटी, बस थांब्यांची स्वच्छता, आसन व्यवस्था नीट करणे, अडगळीतील वस्तू आणि कचरा हटवणे, रस्त्यावर अडथळा ठरणारी निकामी/बेवारस वाहने तसेच अनधिकृत जाहिरात फलकांचे निष्कासन, पदपथांचे पेव्हर ब्लॉक व दुभाजकांची दुरुस्ती आणि रंगरंगोटी आदी बाबींचा समावेश होता. एकूण १६ यांत्रिक स्वच्छता संयंत्रांच्या साह्याने दोन्ही महामार्गांवर व्यापक स्वच्छता करण्यात आली. या वेळी १५८.५ टन राडारोडा, ३५.४ टन कचरा आणि २४.५ टन अन्य टाकाऊ वस्तू संकलित करून त्यांची विल्हेवाट लावण्यात आली.