दीड कोटींच्या हिऱ्याची चोरी

दीड कोटींच्या हिऱ्याची चोरी

मुंबई, ता. १ ः जीआयए प्रमाणित १.७० कोटींचा हिरा हातचलाखीने चोरणाऱ्या तीन व्यावसायिकांविरोधात बीकेसी पोलिसांनी नुकताच गुन्हा नोंदवला. भारत डायमंड बोर्स येथे कार्यालय असलेली अक्षत इम्पेक्स कंपनी जीआयए प्रमाणित हिऱ्यांची ऑनलाइन विक्री करते. कंपनीने हा हिरा ऑनलाइन पोर्टलवर विक्रीसाठी ठेवला होता. व्यापारी घनश्याम तागडिया, भरत गंगाणी यांनी तो खरेदी करण्याची इच्छा व्यक्त करीत पाहण्यासाठी मागवला. पाहण्याच्या निमित्ताने त्यांनी हातचलाखी करीत मूळ हिरा आपल्याकडे घेत नकली खडा परत केला. पुढे हा हिरा हाँगकाँग येथील व्यापारी प्रीतेश शहा यांनी प्रमाणित करून घेण्यासाठी जीआयएकडे पाठवला. ही बाब लक्षात येताच अक्षत इम्पेक्स कंपनीने बीकेसी पोलिस ठाण्यात धाव घेत तक्रार दिली.