मुंबई विद्यापीठातर्फे जय भीम पदयात्रेचे आयोजन

मुंबई विद्यापीठातर्फे ‘जय भीम पदयात्रे’चे आयोजन

मुंबई, ता. १३ : मुंबई विद्यापीठाचे राष्ट्रीय सेवा योजना (एनएसएस) कक्ष आणि नेहरू युवा केंद्र संघटन यांच्या संयुक्त विद्यमाने भारतरत्न डॉ. बाबासाहेब आंबेडकर यांच्या १३४व्या जयंतीच्या पूर्वसंध्येला रविवारी (ता. १३) ‘जय भीम पदयात्रे’चे आयोजन करण्यात आले होते.
युवक व्यवहार आणि क्रीडा मंत्रालयाच्या मार्गदर्शनाखाली आयोजित या कार्यक्रमात ९०० हून अधिक स्वयंसेवक आणि एनएसएस कार्यक्रम अधिकाऱ्यांनी उत्साही सहभाग नोंदवला. ही पदयात्रा नरिमन पॉइंट येथील बाबासाहेबांच्या प्रतिमेला आदरांजली अर्पण करून संविधानाच्या प्रस्ताविकेचे सामूहिक वाचन करीत मादाम कामा रोडवरील डॉ. बाबासाहेब आंबेडकर यांच्या पुतळ्यापर्यंत आयोजित करण्यात आली होती. या वेळी केंद्रीय युवा आणि क्रीडा मंत्रालय राज्यमंत्री रक्षा खडसे यांच्यासह मंत्री मंगलप्रभात लोढा, माजी मंत्री राजकुमार बडोले, माजी खासदार अमर साबळे हे उपस्थित होते. या पदयात्रेच्या आयोजनामध्ये एनएसएसचे क्षेत्रीय संचालक अजय शिंदे, राज्य संपर्क अधिकारी नीलेश पाठक, नेहरू युवा केंद्राचे प्रकाश मनुरे यांनी आयोजनामध्ये महत्त्वपूर्ण भूमिका बजावली. पदयात्रेतील युवापिढीचा हा सक्रिय सहभाग निश्चितच बाबासाहेबांच्या स्वप्नातील समाज घडवण्यासाठी एक महत्त्वाचे पाऊल ठरेल, असा आशावाद मुंबई विद्यापीठाचे एनएसएसचे विशेष कार्य अधिकारी सुशील शिंदे यांनी व्यक्त केला.
Associated Media Ids : MBI25B21823, MBI25B21824