महाराष्ट्र राज्य समाजसेवा अधीक्षक संघटनेचे वार्षिक अधिवेशन

महाराष्ट्र राज्य समाजसेवा अधीक्षक संघटनेचे वार्षिक अधिवेशन
मुंबई : महाराष्ट्र राज्य समाजसेवा अधीक्षक वैद्यकीय, मनोविकृती संघटना, मुंबई यांचे वार्षिक अधिवेशन नुकतेच डॉ. शंकरराव चव्हाण शासकीय वैद्यकीय महाविद्यालय व रुग्णालय, नांदेड येथे उत्साहात संपन्न झाले. कार्यक्रमाच्या अध्यक्षस्थानी अधिष्ठाता डॉ. सुधीर देशमुख होते, तर प्रमुख पाहुणे म्हणून वैद्यकीय अधीक्षक डॉ. विजय कापसे आणि प्रादेशिक उपायुक्त तेजस माळवदकर उपस्थित होते. दीपप्रज्वलनानंतर दहशतवादी हल्ल्यात मृत्युमुखी पडलेल्यांना व दिवंगत समाजसेवा अधीक्षकांना श्रद्धांजली अर्पण करण्यात आली. अधिष्ठाता डॉ. देशमुख यांनी समाजसेवा अधीक्षकांची रुग्णालयातील महत्त्वपूर्ण भूमिका अधोरेखित करत ‘सीएसआर’च्या माध्यमातून मिळालेल्या सेवांची माहिती दिली. डॉ. कापसे यांनी समाजसेवा अधीक्षकांच्या कार्याचे महत्त्व सांगताना त्यांच्या सामाजिक सहभागाचे कौतुक केले. प्रादेशिक उपायुक्त माळवदकर यांनी पदोन्नती व वेतनश्रेणीसाठी शासन दरबारी पाठपुरावा करण्याची गरज अधोरेखित केली. या वेळी अध्यक्ष विजय गायकवाड व सचिव सतीश वाघ यांनी संघटनेची पार्श्वभूमी व अहवाल सादर केला. नवीन कार्यकारिणी घोषित करण्यात आली असून, किशोर धर्मले अध्यक्ष, सतीश वाघ सचिव, संतोष पवार उपाध्यक्षपदी निवडले गेले.