एस्कॉर्ट सेवेच्या निमित्ताने विद्यार्थ्याला सहा लाखांचा गंडा

एस्कॉर्ट सेवेच्या निमित्ताने विद्यार्थ्याला सहा लाखांचा गंडा
मुंबई, ता. १३ ः गुगलद्वारे एस्कॉर्ट सेवा शोधणाऱ्या २३ वर्षीय विद्यार्थ्याकडून सायबर भामट्यांनी सहा लाख उकळले. एका टप्प्यावर विद्यार्थ्याने प्रतिकार केला असता त्याला पोलिसांची भीती घालून, बदनामीची धमकी देऊन पैसे उकळण्यात आले. याप्रकरणी माटुंगा पोलिस ठाण्यात गुन्हा नोंद असून पोलिस तांत्रिक तपासाद्वारे आरोपींचा शोध घेत आहेत.
मूळचा तमिळनाडूचा रहिवासी असलेला तक्रारदार विद्यार्थी शिक्षण घेत असून एका खासगी कंपनीत रिसर्च ट्रेनी म्हणूनही काम करतो. रविवारी (ता. ४) रात्री या विद्यार्थ्याने वेश्यागमनासाठी गुगलद्वारे एस्कॉर्ट सेवा पुरविणाऱ्या कंपन्यांची शोधाशोध सुरू केली. एका संकेतस्थळावर त्याला एक व्हॉट्सॲप क्रमांक मिळाला. त्यावर संपर्क साधून सेवेची मागणी केली. तीन हजार रुपयांना व्यवहार ठरला; मात्र नंतर एकएक करून त्याच्याकडून पैसे उकळण्यास सुरुवात झाली.
पोलिसांनी दिलेल्या माहितीनुसार, आरोपींनी प्रथम या तरुणाकडून तीन हजार घेतले. नंतर सिक्युरिटी डिपॉझिट, इन्शुरन्स, प्रोसेसिंग फी, पोलिस पडताळणी आणि जीएसटीच्या निमित्ताने सहा लाख रुपये उकळले. अखेरच्या टप्प्यात तरुणाला संशय आल्याने त्याने पैसे देण्यास नकार दिला व आधी पाठवलेली रक्कम परत मागू लागला. तेव्हा भामट्यांनी हे प्रकरण पोलिसांना सांगून तुझी बदनामी करू, अशी धमकी दिली. भीतीपोटी पुढील रक्कमही दिल्याचे या तरुणाने चौकशीदरम्यान पोलिसांना सांगितले.