कामा रुग्णालयात युरो गायनॅकॉलॉजी फेलोशिप प्रोग्रॅम सुरू दोन वर्षांचा कालावधी, दरवर्षी दोन विद्यार्थ्यांना प्रवेश

कामा रुग्णालयात युरो स्त्रीरोगतज्ज्ञ फेलोशिप प्रोग्रॅम सुरू
दोन वर्षांचा कालावधी, दरवर्षी दोन विद्यार्थ्यांना प्रवेश
सकाळ वृत्तसेवा
मुंबई, ता. २० : महिलांच्या खास आरोग्यविषयक उपचारांसाठी कार्यरत असलेल्या कामा रुग्णालयात युरो स्त्रीरोगतज्ज्ञांसाठी विशेष ओपीडी सुरू करण्यात आली आहे. त्यासोबतच, युरो स्त्रीरोगतज्ज्ञ या वैद्यकीय क्षेत्रातील विशेष फेलोशिप प्रोग्रॅमसाठी महाराष्ट्र आरोग्य विज्ञान विद्यापीठाकडून अधिकृत मान्यता मिळाली आहे. हा प्रोग्रॅम दोन वर्षांचा असून, प्रत्येक वर्षी दोन विद्यार्थ्यांना प्रवेश दिला जाणार आहे. या शासकीय रुग्णालयामध्ये युरो स्त्रीरोगतज्ज्ञांमध्ये फेलोशिप कोर्स सुरू करणारे कामा रुग्णालय हे देशातील पहिले रुग्णालय ठरले आहे.
या कोर्समुळे युरो स्त्रीरोगतज्ज्ञांत प्रशिक्षित तज्ज्ञांची नवीन फळी तयार होणार असून, महिलांच्या अनेक गंभीर व दुर्लक्षित आजारांवर प्रभावी उपचाराची सुविधा उपलब्ध होणार आहे. गर्भाशय, लघवी, मूत्रपिंड, पिशवी, मलद्वाराशी संबंधित आजारांवर या क्षेत्रातील तज्ज्ञांच्या मार्गदर्शनाने अधिक प्रभावी उपचार करता येतील, असे आरोग्य क्षेत्रातील तज्ज्ञांचे मत आहे.
महिलांच्या आरोग्यासंदर्भात युरो स्त्रीरोगतज्ज्ञ हा एक महत्त्वाचा आणि वाढती गरज असलेला विभाग आहे. यामध्ये फेलोशिप घेतलेले डॉक्टर भविष्यात ग्रामीण आणि शहरी भागात विशेष उपचार सुविधा पोहोचवू शकतील. महिलांसाठीच्या गुणवत्तापूर्ण आरोग्यसेवेसाठी हा प्रोग्रॅम मैलाचा दगड ठरेल, असे कामा रुग्णालयाचे अधीक्षक डॉ. तुषार पालवे यांनी सांगितले.