पदवी प्रवेशपूर्व नोंदणीची आज अंतिम मुदत

पदवी प्रवेशपूर्व नोंदणीची आज अंतिम मुदत

मुंबई, ता. २५ ः मुंबई विद्यापीठाच्या पदवी अभ्यासक्रमांच्या प्रवेशपूर्व ऑनलाइन नावनोंदणीसाठी सोमवारी (ता. २६ मे) अंतिम दिवस असून, ज्या विद्यार्थ्यांनी अद्याप आपले अकॅडमिक बँक ऑफ क्रेडिट ओळख क्रमांक (एबीसी-आयडी) तयार केलेला नाही, त्यांनी १५ दिवसांच्या आत आपला हा एबीसी-आयडी तयार करून प्रवेश प्रोफाइलमध्ये अद्ययावत करणे बंधनकारक असल्याचे मुंबई विद्यापीठाकडून स्पष्ट करण्यात आले आहे. तसेच एबीसी-आयडी तयार होईपर्यंत महाविद्यालयांनी संबंधित विद्यार्थ्यांना तात्पुरता प्रवेश देण्यात यावा, असेही स्पष्ट करण्यात आले आहे. एबीसी-आयडी तयार करणे आणि ते पोर्टलवर अपलोड करणे ही विद्यार्थी व महाविद्यालय यांची संयुक्त जबाबदारी असून, सर्व संबंधित महाविद्यालये आणि विद्यार्थी यांनी याची गांभीर्याने नोंद घ्यावी, असे परीक्षा व मूल्यमापन मंडळाच्या संचालिका डॉ. पूजा रौंदळे यांनी सांगितले.