धारावीतील झेप्टो कंपनीचा परवान्याचे निलंबन

धारावीतील झेप्टो कंपनीच्या परवान्याचे निलंबन
‘अन्न व औषध’ची कारवाई; अटींचे गंभीर उल्लंघन

सकाळ वृत्तसेवा
मुंबई, ता. २ : अन्न व औषध प्रशासन (एफडीए), महाराष्ट्र (मुंबई विभाग) यांच्यातर्फे ३१ मे २०२५ रोजी किरणाकार्ट टेक्नॉलॉजीज प्रायव्हेट लिमिटेड (झेप्टो) धारावी, मुंबई येथील अन्न व्यवसाय परवान्याचे तत्काळ निलंबन करण्यात आले आहे. ही कारवाई अन्न व औषध प्रशासन राज्यमंत्री योगेश कदम यांच्याकडून मिळालेल्या माहितीच्या आधारे आणि एफडीएचे सहआयुक्त मंगेश माने यांच्या मार्गदर्शनाखाली अन्न सुरक्षा अधिकारी राम बोडके यांनी केलेल्या तपासणीत आढळलेल्या गंभीर त्रुटींवर आधारित आहे.
प्रशासनाकडून केलेल्या तपासणीत काही अन्नपदार्थांवर बुरशी, साचलेल्या पाण्याजवळ अन्नसामग्री साठवली जात होती, स्वच्छतेचा अभाव स्पष्ट होता, कोल्ड स्टोरेजमध्ये आवश्यक तापमान राखले जात नव्हते, मजले भिजलेले व अस्वच्छ होते, अन्नपदार्थ थेट जमिनीवर ठेवलेले होते आणि मुदत संपलेला व न संपलेला साठा वेगळा न ठेवता एकत्रच साठवलेला होता. हे सर्व प्रकार परवाना अटींचे गंभीर उल्लंघन करणारे असून, अन्न सुरक्षा व मानके अधिनियम, २००६ तसेच अन्न व्यवसाय परवाना आणि नोंदणी नियम, २०११च्या विरोधात आहेत.
------------------------------
नियमांच्या पालनानंतर मंजुरी
वरील त्रुटींवरून एफडीएच्या सहाय्यक आयुक्त अनुपमा बाळासाहेब पाटील यांनी अन्न सुरक्षा व मानके अधिनियम, २००६च्या कलम ३२ (३) आणि परवाना नियम, २०११च्या नियम २.१.८(४) अंतर्गत तत्काळ निलंबनाचा आदेश दिला आहे. ही कारवाई परवानाधारकाकडून संपूर्ण नियमांचे पालन करून एफडीएकडून मंजुरी मिळेपर्यंत लागू राहणार आहे.
------------------------------
एफडीएचे अन्न सुरक्षा आयुक्त राजेश नार्वेकर (भा.प्र.से.) यांच्या नेतृत्वाखाली जनतेच्या आरोग्यास प्राधान्य देत अन्न सुरक्षेच्या नियमांचे काटेकोर आणि पारदर्शक पालन करण्यात येत आहे.