एसटी कर्मचाऱ्यांच्या वेतनाचा तिढा कायम

एसटी कर्मचाऱ्यांच्या वेतनाचा तिढा कायम
या महिन्यातही निधीची कमतरता

सकाळ वृत्तसेवा
मुंबई, ता. ६ : एसटी कर्मचाऱ्यांच्या वेतनासाठी दर महिन्याला सरकारकडून निधी उपलब्ध करून दिला जातो; पण गेले अनेक महिने मागणीप्रमाणे आवश्यक निधी येत नसल्याने कर्मचाऱ्यांना नक्त वेतन देण्यात येत असून, या महिन्यात पुन्हा पूर्ण वेतन देण्याइतका निधी सरकारकडून आलेला नाही. त्यामुळे केवळ नक्त वेतन मिळणार आहे.
महाराष्ट्र एसटी कर्मचारी काँग्रेसचे सरचिटणीस श्रीरंग बरगे म्हणाले की, एसटी महामंडळाची आर्थिक स्थिती एकदम बिकट असल्याने एसटी कर्मचाऱ्यांच्या वेतनासाठी सरकारकडून दर महिन्याला सवलत मूल्य प्रतिपूर्ती रक्कम देण्यात येत आहे. ती कधीच पूर्ण येत नसल्याने पूर्ण वेतन देण्यात अडचणी निर्माण होत असून, साधारण ३,५०० कोटी रुपयांची देणी कर्मचाऱ्यांच्या वेतनातून कपात होऊनसुद्धा त्या त्या संस्थांकडे वर्ग करण्यात आलेली नाहीत. कर्मचाऱ्यांची व महामंडळाची एकूण थकीत देणी रक्कम ही सात हजार कोटी रुपयांच्यावर गेली असून, संचित तोटा १० हजार कोटी रुपयांच्यावर गेला आहे. त्यामुळे एसटी प्रशासन हतबल झाले आहे.
...
एक हजार कोटींची मागणी
या महिन्याच्या वेतनासाठी व इतर थकीत देणी यासाठी शासनाकडे एक हजार कोटी रुपयांपेक्षा जास्त रकमेची मागणी करण्यात आली होती; पण त्यातील केवळ ३७४ कोटी नऊ लाख रुपये इतका निधी सरकारकडून देण्यात आला आहे. ८७ हजार कर्मचाऱ्यांना नक्त वेतन देण्यासाठी ३७७ कोटी रुपये इतकी रक्कम लागते, तर पूर्ण वेतन देण्यासाठी ४६० कोटी रुपये इतकी रक्कम लागते. पुरेसा निधी उपलब्ध नसल्याने या महिन्यातही नक्त वेतन देण्याची नामुष्की व्यवस्थापनावर ओढवली आहे, असे बरगे यांनी म्हटले आहे. निधीअभावी रजा रोखीकरण महामंडळाकडून रोखण्यात आल्याचेही श्रीरंग बरगे यांनी म्हटले आहे.