कोळीवाड्यांतील अंतर्गत रस्ते होणार चकाचक

कोळीवाड्यांतील अंतर्गत रस्ते होणार चकाचक
सकाळ वृत्तसेवा
मुंबई, ता. ९ : सध्या मुंबईत रस्त्यांची कामे सुरू असून, आता कोळीवाड्यांतील अंतर्गत रस्त्यांची कामेदेखील हातात घेण्यात येत असून, त्‍यामुळे नागरिकांना मोठा दिलासा मिळणार आहे. पहिल्या टप्प्यात बोरिवली येथील कोळीवाड्यातील रस्त्यांचे डांबरीकरण केले जाणार आहे.
मुंबईतल्या गावठाणांमध्ये असणारे अनेक कोळीवाडे सेवासुविधांपासून दूर असल्याचा आरोप नेहमीच केला जातो. रस्ते, कचरा, पाणी आदी सेवा देण्याकडे प्रशासनाचे दुर्लक्ष होत असल्याचा आरोप नेहमीच केला जातो. आता मात्र गावठाणांमधील कामेदेखील हातात घेण्यात आली आहेत.
गेल्या कित्येक वर्षांपासून रखडलेले बोरिवली पश्चिम येथील लोअर कोळीवाडा ते बीचवाडीपर्यंतच्या रस्त्याच्या डांबरीकरणाचे काम हाती घेण्यात येत आहे. स्थानिक आमदार संजय उपाध्याय यांनी यासाठी पाठपुरावा केला होता. या रस्त्याच्या कामामुळे नागरिकांना दिलासा मिळेलच, शिवाय परिसराच्या विकासाला नवी चालना मिळेल. वर्षानुवर्षे असलेली स्थानिकांची मागणी अखेर प्रत्यक्षात उतरू लागली आहे. इतर कोळीवाड्यांतील रस्त्यांची कामे करण्यात येणार असून, त्‍यामुळे गावठाणांमध्ये राहणाऱ्या लोकांना दिलासा मिळणार आहे, असे माजी नगरसेवक शिवानंद शेट्टी यांनी सांगितले.