सुट्ट्या दुधाची भेसळ पडणार महागात

सुट्ट्या दुधाची भेसळ पडणार महागात

Published on

सुट्ट्या दुधाची भेसळ पडणार महागात
आता जागेवरच तपासणी; एफडीएकडे मिल्को स्क्रीन मशीन
सकाळ वृत्तसेवा
मुंबई, ता. १० : बाजारात विशेषतः ग्रामीण भागात मोठ्या प्रमाणात सुट्ट्या दुधाची विक्री आणि भेसळ होते, मात्र यापुढे सुट्ट्या दुधाची जागेवरच तपासणी होणार आहे. अन्न व औषध प्रशासन विभागाच्या ताफ्यात अद्ययावत ‘मिल्को स्क्रीन मशीन’ दाखल होणार आहेत. या मशीनच्या माध्यमातून सुट्ट्या दुधात भेसळ केली आहे का, हे काही मिनिटांत उघडकीस येणार आहे.
सुट्ट्या दुधात भेसळ असल्याचे निष्पन्न झाल्यास संबंधितांवर कठोर कारवाई करण्यात येईल, असा इशारा गृहराज्यमंत्री योगेश कदम यांनी दिला आहे. राज्यातील जनतेला शुद्ध दूध मिळावे, यासाठी राज्य सरकार सतत प्रयत्नशील आहे. नामांकित कंपन्या पिशवीतील दुधाची विक्री करतात, पण कंपनीतून आलेले दूध ग्राहकांपर्यंत पोहोचेपर्यंत त्यात भेसळ झाल्याचे एफडीएने केलेल्या कारवाईतून अनेकदा समोर आले आहे.
पिशवीतील दुधाची जकात नाका, दुकानात जाऊन तपासणी करण्यात येते. भेसळयुक्त दूध असल्याचे निष्पन्न झाल्यास संबंधितांवर कारवाई करण्यात येते, पण आजही सुट्ट्या दुधाची विक्री होते. याआधी दुधाची तपासणी करण्यासाठी नमुने प्रयोगशाळेत पाठवले जात होते, परंतु मिल्को स्क्रीन मशीनमुळे दुधात भेसळ केली आहे की, नाही हे काही मिनिटांत समजेल. ऑन दी स्पाॅट रिझल्ट मिळाल्यास संबंधित मालकावर थेट कारवाई करण्यात येईल.

१५९ फूड निरीक्षकांची भरती
अन्न व औषध प्रशासन विभागात मनुष्यबळाचा अभाव असल्याने योग्य प्रकारे कारवाई होत नाही. त्यामुळे अन्न व औषध प्रशासन विभागात १५९ फूड निरीक्षकांची भरती करण्यात येणार असल्याचे गृहराज्यमंत्री योगेश कदम यांनी सांगितले.

स्ट्रीट फूडला मिळणार स्टार
मुंबईच्या रस्त्यांवर गल्लोगल्ली स्ट्रीट फूड स्टॉल असून, लोकही स्ट्रीट फूडचा आस्वाद घेत असतात, परंतु त्यांना मिळणारे स्ट्रीट फूड उत्तम दर्जाचे आहे की नाही याची तपासणी योग्य प्रकारे होत नाही. लोकांच्या आरोग्याची काळजी घेत स्ट्रीट फूडची तपासणी करण्यात येणार असून, उत्तम दर्जाचे स्ट्रीट फूड असल्यास त्या विक्रेत्याला स्टार देण्यात येणार आहेत.

सकाळ+ चे सदस्य व्हा

ब्रेक घ्या, डोकं चालवा, कोडे सोडवा!

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com