अल्पवयीन मुलीला अर्धनग्न केल्याप्रकरणी आठ महिलांवर गुन्हा

अल्पवयीन मुलीला अर्धनग्न केल्याप्रकरणी आठ महिलांवर गुन्हा

मुंबई, ता. २५ : वापरलेले सॅनिटरी पॅड इमारतीच्या आवारात टाकल्याच्या संशयावरून आठ महिला एका अल्पवयीन मुलीच्या घरात शिरल्या, मुलीसह तिच्या आईस शिवीगाळ केली. कहर म्हणजे या मुलीला अर्धनग्न करून तिची अंतर्वस्त्रे तपासल्याची घटना समोर आली आहे.
मुलीच्या आईने दिलेल्या या तक्रारीवरून उत्तर मुंबईतील पोलिस ठाण्यात याप्रकरणी गुन्हा नोंद झाला असून, ही घटना मार्चमध्ये शासकीय वसाहतीत घडली. तेव्हा मुलीची आई तक्रार घेऊन पोलिस ठाण्यात आली होती; मात्र समझोता झाल्याने महिलेने ही तक्रार मागे घेतली होती, मात्र या महिलेने मंगळवारी (ता. २४) पुन्हा याप्रकरणी तक्रार दिल्याचे पोलिस ठाण्यातून सांगण्यात आले. शासकीय आस्थापनेतील कामगारांच्या वसाहतीतील एकाच इमारतीत आरोपी महिला आणि पीडित मुलगी राहते. पीडित मुलीचे वडील आणि आरोपी महिलांचे पती एकाच आस्थापनेतील भिन्न विभागात कार्यरत आहेत. या वसाहतीत पीडित कुटुंबाला शासकीय निवासस्थान देण्यात आल्याने अन्य कुटुंबांनी तक्रारी केल्या होत्या. त्यावरून वाद सुरू झाले होते. त्याच वादातून आरोपी महिलांनी ही कृत्य केल्याचा संशय आहे. याबाबत अधिक तपास सुरू असल्याचे पोलिसांनी सांगितले.