‘आयएमए’चा ११ जुलैला राज्यव्यापी संप

‘आयएमए’चा ११ जुलैला राज्यव्यापी संप
होमिओपॅथीप्रकरणी संताप

सकाळ वृत्तसेवा
मुंबई, ता. ६ : होमिओपॅथी डॉक्टरांनी ‘आधुनिक वैद्यकीय व्यवसायी’ म्हणून मान्यता देण्याच्या राज्य सरकारच्या निर्णयाविरोधात इंडियन मेडिकल असोसिएशन (आयएमए महाराष्ट्र) ११ जुलैला राज्यव्यापी संप पुकारणार आहे. त्यापूर्वी राज्यातील सर्व जिल्हाधिकाऱ्यांना निर्णय मागे घेण्यासंदर्भात निवेदन देण्यात येणार असून, त्याकडे दुर्लक्ष केल्यास संपाचा निर्णय घेण्यात येणार आहे.
आयुर्वेद अभ्यासक्रमाचे शिक्षण घेणाऱ्या डॉक्टरांना ॲलोपॅथीचा सराव करण्यास केंद्र सरकारने मान्यता दिल्यानंतर आता होमिओपॅथी डॉक्टरांनी औषधशास्त्र या विषयाचा एक वर्षाचा सीसीएमपी हा ब्रीज कोर्स पूर्ण केल्यावर त्यांना महाराष्ट्र वैद्यकीय परिषदेकडे नोंदणी करण्यास राज्य सरकारने मान्यता दिली; मात्र हा निर्णय सर्वसामान्यांच्या आयुष्याशी खेळणारा आहे. आपत्कालीन परिस्थितीमध्ये चुकीचे औषधोपचार, चुकीचे निदान झाल्यास रुग्णाच्या जीवाला धोका निर्माण होऊ शकतो. यामुळे डॉक्टरांची प्रतिमा मलिन होण्याची शक्यता आहे. त्यामुळे राज्य सरकारच्या या निर्णयाविरोधात आयएमएने फेब्रुवारीमध्ये उच्च न्यायालयात याचिका दाखल केली होती. हे प्रकरण अजूनही न्यायालयात प्रलंबित असतानाही सरकारने १५ जुलै २०२५पासून हा आदेश जारी करण्याचा निर्णय कायम ठेवला आहे. त्यामुळे या निर्णयाविरोधात आयएमएने आक्रमक पावित्रा घेतला आहे. सरकारच्या या निर्णयाविरोधात रविवारी आयएमए पंढरपूर या शाखेने मुख्यमंत्री देवेंद्र फडणवीस यांना निर्णय मागे घेण्यासंदर्भात निवेदन दिले. त्याच वेळी मुंबईमध्ये आयएमएने, एएमसी, मार्ड, आयएमए एमबीबीएस, मॅग्मो या राज्यातील डाॅक्टर संघटनांसोबत चर्चा केली.
...
जिल्हाधिकाऱ्यांना निवेदन
राज्यातील सर्व जिल्हाधिकाऱ्यांना निर्णय मागे घेण्यासंदर्भात मंगळवारी (ता. ८) निवेदन देण्यात येणार आहे. याकडे सरकारने दुर्लक्ष केल्यास ११ जुलैला एकदिवसीय राज्यव्यापी संप करण्याचा निर्णय घेण्यात आला. राज्यातील सर्व खासगी रुग्णालये, क्लिनिक, दवाखाने ११ जुलैला बंद ठेवण्यात येणार आहेत, अशी माहिती आयएमए महाराष्ट्राचे अध्यक्ष डॉ. संतोष कदम यांनी दिली.