रुग्णालयांच्या खासगीकरणाविरोधात मोर्चा

सकाळ वृत्तसेवा
मुंबई, ता. ७ : मुंबईतील महत्त्वाच्या सार्वजनिक रुग्णालयांच्या खासगीकरणाचा राज्य सरकारने निर्णय घेण्यात आला आहे. या रुग्णालयांमध्ये लल्लुभाई कंपाउंड मल्टीस्पेशालिटी रुग्णालय आणि शताब्दी रुग्णालय यांचा समावेश असल्याने निर्णयाविरोधात कृती समितीने सोमवारी मोर्चा काढला.
महापालिकेने लल्लुभाई कंपाउंड रुग्णालयाच्या कामकाजासाठी खासगी भागीदार शोधण्यासाठीची निविदा ५ मार्च २०२५ रोजी प्रसिद्ध केली होती. त्यानंतर १३ जून रोजी नागरी आरोग्य सहकार्य मॉडेलअंतर्गत शताब्दी रुग्णालयासाठी अशाच प्रकारची निविदा प्रसिद्ध करण्यात आली. ज्यामध्ये १०० खाटांचे खासगी वैद्यकीय महाविद्यालय उभारण्याचा प्रस्तावही समाविष्ट आहे. या खासगीकरणाचा हेतू सहा रुग्णालयांपर्यंत विस्तारित करण्यात येणार असून, त्यात श्री हरिलाल भगवती रुग्णालय (बोरिवली), केबी भाभा रुग्णालय (वांद्रे), एमटी अग्रवाल रुग्णालय (मुलुंड) आणि क्रांतिवीर महात्मा जोतिबा फुले रुग्णालय (विक्रोळी) यांचा समावेश आहे.
---------------------------
२२ पेक्षा अधिक संघटनांनी सहभागी
मुंबईतील सार्वजनिक आरोग्यसेवा खासगीकरणाच्या हाती देण्याच्या या प्रयत्नांना कृती समितीने तीव्र विरोध नोंदवला आहे. ही दोन्ही रुग्णालये अत्यल्प संसाधन असलेल्या एम-पूर्व विभागात आहेत. या रॅलीमध्ये स्थानिक रहिवासी, विविध नागरी समूह, सामाजिक संघटना, स्वयंसेवी संस्था आणि राजकीय पक्ष अशा २२ पेक्षा अधिक संघटनांनी एकत्र येऊन संयुक्त कृती समितीची स्थापना केली.