सहार पोलिस ठाण्यात आरोपीची आत्महत्या

सहार पोलिस ठाण्यात
आरोपीची आत्महत्या
मुंबई, ता. ७ : मोबाईल चोरीप्रकरणी अटक केलेल्या २६ वर्षीय तरुणाने सहार पोलिस ठाण्याच्या कोठडीत आत्महत्या केली. अंकित राय असे मृत तरुणाचे नाव असून, तो विमानतळाजवळील एका हॉटेलमध्ये स्वयंपाकी म्हणून काम करीत होता.
पोलिसांनी दिलेल्या माहितीनुसार, अंकित हा पाच मित्रांसोबत राहात होता. काही दिवसांपूर्वी त्यांच्या खोलीतून पाच मोबाईल चोरीला गेले होते. तक्रारीनंतर तपास सुरू झाला आणि अंकितकडे तीन मोबाईल सापडल्याने पोलिसांनी त्याला अटक केली.
सोमवारी सकाळी अंकितने कोठडीतील शौचालयात गळफास घेऊन आत्महत्या केली. गमच्याचा वापर करून त्याने हे टोकाचे पाऊल उचलले. चोरीच्या आरोपामुळे तो मानसिक तणावात असल्याचे बोलले जात आहे. कोठडीत गमचा कसा पोहोचला, याचा तपास सुरू असून, या प्रकरणाचा तपास गुन्हे शाखेकडे सोपवण्यात आला आहे.