‘एसआरए’चे भवितव्य गृहनिर्माणच्या हाती

सकाळ वृत्तसेवा
मुंबई, ता. ८ : म्हाडाच्या जमिनीवरील रखडलेले चार एसआरए प्रकल्प पूर्ण केले जाणार आहेत, मात्र ५० कोटींहून अधिकचा खर्च असलेल्या या प्रकल्पांना गृहनिर्माण विभागाची परवानगी घ्यावी लागणार आहे. त्यासाठीचे प्रस्ताव पाठवण्यात आले असून, मंजुरी मिळताच कामे सुरू होणार आहेत.
म्हाडाच्या भूखंडावरील झोपड्यांचा, जुन्या चाळींचा एसआरए योजनेंतर्गत पुनर्विकास करण्यात येणार होता, मात्र वेगवगेळ्या कारणाने पुनर्विकास वर्षानुवर्षे रखडला आहे. त्यामुळे राज्य सरकारने एसआरए आणि म्हाडामधील सह भागीरदारीला (जॉइंट व्हेंचर) मंजुरी दिली आहे. जवळपास १७ प्रकल्प निवडण्यात आले होते. त्यापैकी कुर्ला येथील दोन, तर जोगेश्वरीतील दोन प्रकल्पांचा समावेश आहे. या प्रकल्पांना प्रत्येकी ५० कोटींहून अधिक खर्च अपेक्षित आहे. त्यामुळे गृहनिर्माण विभागाची मंजुरी बंधनकारक असल्याने म्हाडाने प्रस्ताव पाठवल्याची माहिती अधिकाऱ्यांनी दिली.
-----------
जोगेश्वरी मजास विभाग
- त्रिचरण को-ऑपरेटिव्ह हौसिंग सोसायटी.
- साईबाबा को-ऑपरेटिव्ह हौसिंग सोसायटी.
- वरील दोन्ही प्रकल्पात सुमारे ३०० हून अधिक रहिवासी.
- प्रकल्प पूर्ण केल्यानंतर म्हाडाला २९० घरे मिळणार.
-----
कुर्ला विभाग
- कुर्ला येथील श्रमिक नगर एसआरएस को-ऑपरेटिव्ह हौसिंग सोसायटी.
- चेंबूर येथील जागृती एसआरए सीएचएस सोसायटी.
- दोन्ही ठिकाणी सुमारे २६१ रहिवासी.
- पुनर्विकासाच्या माध्यमातून म्हाडाला घरे मिळणार.