घरासाठी पोराबाळांसह आझाद मैदानावर आक्रोश

मुंबई, ता. ८ ः कळंबोलीजवळील उड्डाणपुलालगत भंगार वेचून उदरनिर्वाह करणाऱ्या डोंबारी, पारधी लोकांचा निवारा स्थानिक पालिका प्रशासनाने तोडला आहे. या कारवाईमुळे रस्त्यावर आलेल्या कुटुंबांनी पोराबाळांसह आझाद मैदानात धरणे आंदोलन सुरू केले आहे.
आसूडगावात २५ वर्षांहून अधिक काळापासून वास्तव्य असलेल्या रहिवाशांना स्थानिक प्रशासनाने रस्त्यावर आणले. गावातही घर नाही आणि शहरातल्या झोपड्यांवर बुलडोझर लावल्याने पूर्णपणे उद्ध्वस्त झाल्याच्या भावना या रहिवशांमध्ये आहे. आमच्या झोपड्याच राहिल्या नसल्याने मुला-बाळांसह आम्ही आता रस्त्यावर आलो, त्यांना शाळेतही पाठवू शकत नसल्याने न्यायासाठी आंदोलनाला बसल्याचे आंदोलकांकडून सांगण्यात आले. आम्हाला राहत असलेल्या ठिकाणीच आमच्या झोपड्यांच्या आधारावर शासनाने घर उपलब्ध करून द्यावे, आमच्यासाठी असलेल्या घरकुल योजनेचा प्रभावी वापर करावा, आमच्या मुलांना शाळांमध्ये शिक्षण मिळत नसल्याने त्यांना खुल्या शिक्षण पद्धतीतून शिक्षणाची सोय उपलब्ध करून द्यावी, अशी मागणी आसूडगाव (पनवेल) झोपडपट्टी पुनर्वसन संघर्ष समितीच्या आंदोलनकर्त्या अनिता कोलते यांनी केली. तसेच पनवेल पालिकेने आमच्या झोपड्यांवर बेकायदा कारवाईमुळे झालेल्या नुकसानभरपाईसाठी सरकारने आदेश द्यावेत, अशी मागणी करण्यात आली.