रॅपिडो  बाईकटॅक्सी अखेर बंद

रॅपिडो  बाइक टॅक्सी अखेर बंद 
परिवहन मंत्र्यांचा हस्तक्षेप
सकाळ वृत्तसेवा
मुंबई, ता. ८ ः राज्य शासनाने कोणत्याही बाइक ॲपला अधिकृत परवानगी दिलेली नाही. तरीही अवैधरीत्या ॲपद्वारे आरक्षण करून प्रवाशांना घेऊन जाणाऱ्या रॅपिडो बाइकला परिवहन मंत्री प्रताप सरनाईक यांनी रंगेहाथ पकडले; मात्र तरीही रॅपिडो  बाइक टॅक्सी सुरू होती.  याबाबतचे  वृत्त सोमवारी (ता. ७) ‘सकाळ’ वृत्तपत्रात ‘मुंबईत रॅपिडो बाइक टॅक्सी सुरूच’ या मथळ्याखाली प्रकाशित करण्यात आले होते, तर मंगळवारी (ता. ८) ॲपमधून बाइक टॅक्सी सेवा बंद करण्यात आली आहे.
शासनाने नुकतेच ई-बाइक धोरण जाहीर केले असून त्यानुसार विविध अटी-शर्तींचे पालन करणाऱ्या व केवळ इलेक्ट्रिक बाइक असलेल्या संस्थांना यापुढे परवानगी मिळणार आहे. त्यामुळे सध्या अस्तित्वात असलेल्या सर्व बाइक टॅक्सी या अनधिकृत आहेत; मात्र तरीही ओला, उबेर आणि रॅपिडोकडून बाइक चालविण्यात येत होती. त्यावर परिवहन विभागाने कारवाईचा  इशारा दिल्यानंतर ओला आणि उबेर या कंपन्यांनी आपल्या ॲपमधून बाइक टॅक्सीचा पर्याय हटवला होता; मात्र ‘सकाळ’मध्ये वृत्त प्रकाशित झाल्यानंतर सात दिवसांनी बाइक टॅक्सीचा पर्याय ॲपमधून हटवला आहे.  
......
बाइक टॅक्सीबाबत रॅपिडो, ओला आणि उबर या तिन्ही कंपन्यांनी कायद्याचे पालन केलेच  पाहिजे. बाइक टॅक्सीच्या नियमावलीची प्रक्रिया सुरू असून ती तयार झाल्यावर बाइक टॅक्सी सुरू करण्यास कोणतीही हरकत नाही. 
- प्रताप सरनाईक, परिवहन मंत्री