सिद्धार्थ विधी महाविद्यालयात डॉ. सुधाकर रेड्डी यांचे पुनरागमन

सिद्धार्थ महाविद्यालयात डॉ. रेड्डींचे पुनरागमन
न्यायालयाच्या आदेशानंतर पदभार स्वीकारला
मुंबई, ता. ८ : फोर्ट येथील दी पीपल्स एज्युकेशन सोसायटीच्या सिद्धार्थ विधी महाविद्यालयाच्या प्राचार्यपदी डॉ. सुधाकर रेड्डी यांची पुन्हा नेमणूक झाली आहे. ते रिपब्लिकन पार्टी ऑफ इंडियाचे (आठवले गट) राष्ट्रीय अध्यक्ष आणि केंद्रीय राज्यमंत्री रामदास आठवले यांचे निकटवर्तीय मानले जात असल्याने, त्यांच्या पुनरागमनामुळे महाविद्यालयावर आठवले गटाची पुन्हा पकड बसल्याची चर्चा रंगू लागली आहे.
सुमारे तीन वर्षांपूर्वी रिपब्लिकन सेनेचे आनंदराज आंबेडकर यांच्या नेतृत्वाखाली गटाने महाविद्यालयाचा ताबा घेतला होता. त्या वेळी तत्कालीन प्राचार्य डॉ. सुधाकर रेड्डी यांना पदावरून हटवून त्यांच्या जागी संध्या डोखे यांची नियुक्ती करण्यात आली होती. या कारवाईला डॉ. रेड्डी यांनी मुंबई विद्यापीठाकडे आणि न्यायालयात आव्हान दिलं होतं. सर्व न्यायिक प्रक्रियेनंतर, अखेर उच्च न्यायालयाने डॉ. रेड्डी यांच्या बाजूने निर्णय दिला असून, त्यानंतर त्यांनी पोलिस सुरक्षा घेऊन पुन्हा प्राचार्यपदाचा पदभार स्वीकारला आहे.
याबाबत प्रतिक्रिया देताना डॉ. रेड्डी म्हणाले, “ मी फक्त रामदास आठवले यांच्याशी जवळीक राखतो, म्हणून मला अन्यायकारकपणे पदावरून हटवण्यात आले, मात्र न्यायालयाने मला न्याय दिला. गेल्या तीन वर्षांत महाविद्यालयाचे मोठे नुकसान झाले आहे. आता महाविद्यालयाला पुन्हा गतवैभव मिळवून देण्यासाठी मी प्रयत्नशील आहे.”
....