८२ हजार १३२ विद्यार्थ्यांची पाठ

८२ हजार १३२ विद्यार्थ्यांची पाठ
महाविद्यालय मिळूनही अकरावी प्रवेशास नकार
मुंबई, ता. ८ ः अकरावी ऑनलाइन प्रवेश प्रक्रियेत पहिल्या गुणवत्ता यादीमध्ये, पहिल्या पसंतीक्रमानुसार महाविद्यालय मिळूनही तब्बल ८२ हजार १३२ विद्यार्थ्यांनी प्रवेशाकडे पाठ दाखवली आहे. यापैकी एक हजार १८६ विद्यार्थ्यांनी प्रवेश रद्द केले, उर्वरित तीन हजार २८४ महाविद्यालयांमध्ये कनिष्ठ महाविद्यालयांनी विविध तांत्रिक कारणांमुळे या विद्यार्थ्यांचे प्रवेश नाकारले आहेत.
अकरावी ऑनलाइन प्रवेश प्रक्रियेत पहिल्या पसंतीक्रमानुसार प्रवेश निश्चित झालेल्या विद्यार्थ्यांना संबंधित महाविद्यालयामध्ये प्रवेश घेणे बंधनकारक आहे; परंतु यंदाच्या प्रवेश प्रक्रियेत तब्बल ७७ हजार ६६२ विद्यार्थ्यांनी प्रवेश निश्चित होऊनही प्रवेशासाठी कोणतीही प्रक्रिया केली नाही. दुसरीकडे दुसऱ्या पसंतीक्रमानुसार प्रवेश निश्चित झालेल्या ७७ हजार ९० विद्यार्थ्यांपैकी तब्बल ३५ हजार ४७२ विद्यार्थ्यांनी या प्रवेशाकडे पाठ दाखवली.
शिक्षण संचालनालयाने पहिल्या कॅप फेरी आणि कोट्यातील प्रवेशाची शून्य फेरीचे प्रवेश पूर्ण झाल्यानंतर या संदर्भातील कॅप फेरीच्या प्रवेशाची माहिती जाहीर केली आहे. यामध्ये राज्यभरातील कनिष्ठ महाविद्यालयांमध्ये सहा लाख ३२ हजार १९४ विद्यार्थ्यांना विविध महाविद्यालयांमध्ये प्रवेश अलॉट झाले होते. त्यापैकी पाच लाख आठ हजार ९६ विद्यार्थ्यांचे प्रवेश पूर्ण झाले असल्याची माहिती शिक्षण संचालनालयाकडून देण्यात आली. प्रवेश निश्चित झालेल्या विद्यार्थ्यांपैकी तब्बल एक लाख २४ हजार ९८ जागांवर या पहिल्या फेरीत प्रवेश होऊ शकले नाहीत, त्या रिक्त राहिल्या असल्याचे जाहीर करण्यात आलेल्या आकडेवारीवरून दिसून आले आहे.
--
१० जुलैपासून दुसरी फेरी
पहिल्या फेरीच्या प्रवेशानंतर १० जुलैपासून दुसऱ्या प्रवेश फेरीला सुरुवात होत आहे. विद्यार्थ्यांना या फेरीसाठी नवीन नोंदणी, भाग एक, दोन तसेच पसंतीक्रम आदी नोंदणी करून अर्ज एक आणि दोन लॉक करण्याची मुदत १३ जुलै रोजी सायंकाळी साडेसहा वाजेपर्यंत असेल. त्यानंतर १७ जुलै रोजी विद्यार्थ्यांची कॅप आणि कोट्यातील प्रवेशाची गुणवत्ता यादी जाहीर केली जाईल.