‘मोडक सागर’ वाहू लागले!

‘मोडक सागर’
वाहू लागले!
सकाळ वृत्तसेवा
मुंबई, ता. ९ : मुंबईसह उपनगरांची तहान भागवणाऱ्या मोडक सागर जलाशय बुधवारी (ता. ९) काठोकाठ भरला आहे. प्रशासनाने सकाळी ६.२७ वाजता या जलाशयाचा एक दरवाजा एक फुटाने उघडून पाणी सोडण्यास सुरुवात केली आहे. या पार्श्वभूमीवर ठाणे जिल्हा प्रशासनाने आजूबाजूच्या गावांना सावधानतेचा इशारा दिला आहे.

ठाणे जिल्ह्यातील शहापूर तालुक्यातील वैतरणा नदीवर हे जलाशय आहे. या जलाशयातून प्रति सेकंद तब्बल एक हजार २२ घनफूट (क्युसेक) पाणी सोडले जात आहे. या पार्श्वभूमीवर ठाणे जिल्हा प्रशासनाने नदीकाठच्या गावांना सावधानतेचा इशारा दिला आहे. मोडक सागर जलाशयाची पाणी साठवण क्षमता १,२८,९२५ दशलक्ष लिटर इतकी आहे. सध्या जलाशयात १,२८,९१० दशलक्ष लिटर पाणीसाठा आहे. या वर्षी आतापर्यंत या परिसरात १,४०५ मिलिमीटर पाऊस झाला आहे. मुंबईतील तुलशी आणि विहार हे जलाशय आधीच भरले आहेत.
........
जलस्थिती
साठवण क्षमता : १२,८९२.५ कोटी लिटर
सध्याचा साठा : १२,८९१ कोटी लिटर
परिसरातील पाऊस : १,४०५ मिलिमीटर