तोतया आयपीएस अधिकाऱ्याला अटक

तोतया आयपीएस अधिकाऱ्याला अटक
संदीप कर्णिक यांच्या नावे व्यावसायिकांची फसवणूक
सकाळ वृत्तसेवा
मुंबई, ता. ९ ः आयपीएस अधिकारी असल्याचे भासवत पोलिस आयुक्तालय परिसरातील व्यावसायिकांना फसवणाऱ्या भामट्यास गुन्हे शाखेच्या गुन्हेगारी गुप्तवार्ता कक्षाने ताब्यात घेतले. संदीप गोसावी असे आरोपीचे नाव असून, तो काही महिन्यांपासून आयुक्तालय परिसरातील महात्मा फुले मंडई, क्रॉफर्ड मार्केट परिसरात संदीप कर्णिक या आयपीएस अधिकाऱ्याच्या नावाने वावरत होता. त्याने आतापर्यंत अनेक व्यावसायिकांना फसविल्याचे पुढे येत आहे. याप्रकरणी आझाद मैदान पोलिस पुढील तपास करीत आहेत.
माझगाव येथील रहिवासी आणि क्रॉफर्ड मार्केट परिसरात मोबाईल साहित्य विकणाऱ्या नजीम कच्छी यांच्या तक्रारीवरून या तोतया आयपीएस अधिकाऱ्यांचे बिंग फुटले. काही दिवसांपूर्वी गोसावी नजीम यांच्या दुकानावर गेला. मी आयपीएस संदीप कर्णिक असल्याचे सांगत ओळख वाढवली. त्यानुसार मागील महिन्यात गोसावीने नजीम यांना आपला मोबाईल नागपूरला राहिला असून, दोन-चार दिवसांत तो बोलावला आहे. तोपर्यंत एखादा मोबाईल वापरण्यास देण्याची मागणी केली. विश्वासापोटी नजीमने मोबाईल दिला; मात्र तीन-चार दिवसानंतर मोबाईल परत मागितला असता, गोसावीने सुरुवातीला टाळाटाळ केली, नंतर मोबाईलचे पैसे देण्याचे आश्वासन दिले. तेव्हा तो खरेच आयपीएस अधिकारी आहे की नाही, याबाबत संशय बळावला. परिसरात चौकशी केली असता, तो विविध नावांनी बाजारपेठेत वावरत असल्याची माहिती पुढे आली. त्यानुसार, सोमवारी (ता. ७) परिसरात वावरत असताना, गुप्तवार्ता विभागाने त्यास ताब्यात घेतले.