स्वस्तात डॉलर देण्याच्या प्रलोभनावर फसवणूक

स्वस्तात डॉलर देण्याच्या प्रलोभनावर फसवणूक
गुन्हे शाखेकडून सराईत टोळीला अटक
मुंबई, ता. ९ : क्षुल्लक किमतीत अमेरिकेचे डॉलर उपलब्ध करून देण्याचे प्रलोभन दाखवत हातोहात फसवणाऱ्या टोळीला गुन्हे शाखेने सोमवारी (ता. ७) अटक केली. अफजल सय्यद (वय ४२), रईस सय्यद (वय ४६), अबीदूर शहा (वय २५) आणि आदिल खान (वय ४०) अशी आरोपींची नावे आहेत.
या टोळीने अहिल्यानगर जिल्ह्यातील तरुण शेतकऱ्यास २५ लाख रुपयांच्या बदल्यात दीड कोटी रुपये मूल्य होईल इतके डॉलर दिले जातील, असे प्रलोभन दाखवले होते. प्रलोभनास बळी पडलेला शेतकरी या टोळीच्या सांगण्यानुसार मुंबईच्या मानखुर्द परिसरात डॉलर घेण्यासाठी दाखल झाला; मात्र गुन्हे शाखेच्या अधिकाऱ्यांना या फसव्या व्यवहाराची कुणकुण लागली आणि पथकाने सोमवारी मानखुर्द येथील एका लॉजवर छापा घालून अफजल, रईस, अबीदूर आणि आदिल या टोळीस अटक केली.

रसायनात बुडवताच कपट्यांचे डॉलर!
- डॉलरची विक्री अवैध असून, ती पकडली जाऊ नये म्हणून आम्ही दडवून आणतो, असे सांगत ही टोळी काळ्या रंगाचे कपटे नागरिकांसमोर ठेवते. हे कपटे दोन ते तीन रसायनांमध्ये काही काळ बुडवून ठेवल्यावर त्यावरील काळा रंग निघून डॉलरप्रमाणे दिसणारे चलन प्रतिबिंबित होते. हे प्रात्यक्षिक दाखवून या टोळीने नागरिकांच्या हाती बनावट डॉलर ठेवले. त्याबदल्यात रुपये उकळले.