सहार रोडवरील खड्डे भरले!!

सहार रोडवरील खड्डे भरले!
वॉचडॉग फाउंडेशनचा आंदोलनात्मक उपक्रम
मुंबई, ता. ९ : अंधेरी ते छत्रपती शिवाजी महाराज आंतरराष्ट्रीय विमानतळदरम्यान असलेल्या सुमारे चार किमी लांब सहार रोडवरील खड्ड्यांमुळे वाहनचालक त्रस्त आहेत. नागरिकांनी वारंवार मुंबई महापालिका आणि विमानतळ प्रशासनाकडे तक्रारी केल्या; मात्र कोणतीही दखल न घेतल्यामुळे अखेर वॉचडॉग फाउंडेशनच्या कार्यकर्त्यांनी आज स्वतःच रस्त्यावर उतरून खड्डे भरले.
या उपक्रमात वॉचडॉग फाउंडेशनचे १५ ते २० सदस्य सहभागी झाले होते. त्यांनी विशेषत: रॅबीट आणि डेब्रिजचा वापर करून सहार रोडवरील ३५ ते ४० खड्डे भरले. खड्डे भरण्यासाठी त्यांनी स्वतः टेम्पो भाड्याने घेतला आणि त्यामध्ये साहित्य आणले. तब्बल चार तास चाललेल्या या कामामुळे वाहनचालकांना काहीसा दिलासा मिळाला आहे.
या रस्त्याचे व्यवस्थापन हे महापालिकेच्या अखत्यारीत आहे की विमानतळ प्रशासनाच्या, यावरून वाद सुरू आहे. त्यामुळे देखभाल आणि दुरुस्तीच्या जबाबदारीवरही प्रश्नचिन्ह निर्माण झाले आहे.
वॉचडॉग फाउंडेशनचे सदस्य गॉडफ्रे पिमेंटा म्हणाले की, ‘‘हा रस्ता विमानतळ हद्दीत येतो आणि तरीही त्यांनी कोणतीही दखल घेतलेली नाही. वारंवार तक्रारी करूनही दुर्लक्ष होत असल्याने आम्ही स्वतः पुढाकार घेतला.’’
दरम्‍यान, पावसाने जोर पकडल्याने रस्त्यांवर खड्डे पडण्याचे प्रमाण वाढले आहे. यामुळे वाहतूक कोंडी सोबतच वाहनांचेही नुकसान मोठ्या प्रमाणावर होत आहे. रस्त्याची दुरुस्ती तत्काळ केली नाही, तर पुढील वेळी अधिक मोठ्या प्रमाणात आंदोलन छेडले जाईल, असा इशारा वॉचडॉग फाउंडेशनने प्रशासनाला दिला आहे.