शिक्षकांचे आंदोलन मागे

शिक्षकांचे आंदोलन मागे
वाढीव टप्पा अनुदान मंजूर

मुंबई, ता. ९ ः राज्यातील अंशतः अनुदानित शाळांमधील शिक्षकांनी वाढीव टप्पा अनुदानासाठी मुंबईतील आझाद मैदानात मागील दोन दिवसांपासून केलेल्या आंदोलनाला आज यश आले असून सरकारने त्यांचे वाढीव टप्पा अनुदान मंजूर करण्याचे जाहीर केले. यामुळे राज्यातील अंशतः अनुदानित शाळांतील शिक्षकांचे हे आंदोलन आज मागे घेण्यात आल्याची घोषणा अनुदानित शाळा कृती समिती, शिक्षक समन्वय समिती आदी संघटनांकडून करण्यात आली.
दोन दिवस चाललेल्या आंदोलनाला शिक्षकांना राष्ट्रवादी काँग्रेसचे अध्यक्ष शरद पवार, खासदार सुप्रिया सुळे, शिवसेना ठाकरे गटाचे प्रमुख उद्धव ठाकरे यांच्यासह काँग्रेस आणि इतर राजकीय पक्षांच्या नेत्यांनी पाठिंबा दिला होता. या आंदोलक नेत्यांचे शिष्टमंडळ मुख्यमंत्र्यांना भेटले. त्यानंतर त्यांना २०२४च्या शासन निर्णयानुसार वाढीव टप्पा अनुदान मंजूर करण्याची ग्वाही देण्यात आली. त्यानंतर आंदोलन मागे घेण्यात आल्याचे सांगण्यात आले. टप्पा अनुदानाची मागणी सरकारकडून मान्य करण्यात आल्याने राज्यभरातील शिक्षकांकडून जल्लोष साजरा करण्यात आला. दरम्यान, मंत्री गिरीश महाजन यांनी आज आझाद मैदानावर भेट देत शासनाच्या वतीने २०२४च्या निर्णयानुसार वाढीव टप्पा अनुदान अमलात आणण्याची घोषणा केली. तसेच १८ जुलै २०२५ नंतर संबंधित प्रक्रिया पूर्ण केली जाईल, असेही त्यांनी स्पष्ट केले.