रिक्षा-टॅक्सी चालकांचे प्रश्न सुटणार कधी?

रिक्षा-टॅक्सीचालकांचे
प्रश्न सुटणार कधी?
शिष्टमंडळ मंत्र्यांना भेटले
सकाळ वृत्तसेवा
मुंबई, ता. १० : रिक्षा-टॅक्सीचालकांचे प्रश्‍न मार्गी लावण्याबाबत ऑटो टॅक्सी ट्रान्सपोर्ट फेडरेशन, महाराष्ट्र रिक्षा पंचायत आणि रिक्षा ब्रिगेड या संघटनांचे अध्यक्ष डॉ. बाबा कांबळे यांच्या नेतृत्वाखालील शिष्टमंडळाने नुकतीच मुंबई येथे महाराष्ट्र राज्याचे परिवहन मंत्री प्रताप सरनाईक आणि उद्योग मंत्री उदय सामंत यांची भेट घेऊन निवेदन दिले.
बाबा कांबळे म्हणाले, की रिक्षा आणि टॅक्सी चालक-मालकांच्या विविध प्रश्नांवर सविस्तर चर्चा करून शिष्टमंडळाच्या वतीने निवेदन सादर करण्यात आले. परिवहन मंत्री प्रताप सरनाईक यांनी रिक्षा-टॅक्सीचालकांच्या प्रश्नांना सकारात्मक प्रतिसाद देत तातडीने उपाययोजना करण्याचे आणि प्रश्न सोडविण्याचे आश्वासन दिले.
रिक्षा-टॅक्सीचालकांच्या मागाण्यांमध्ये ओला, उबेर, रॅपिडो यांच्याकडून होणारी पिळवणूक थांबवणे, सीएनजी बाटली पासिंगचे दर कमी करणे, बेकायदा वाहतुकीवर नियंत्रण, मुक्त रिक्षा परवाने बंद करणे, कल्याणकारी महामंडळाची अंमलबजावणी या मागण्यांचा समावेश आहे.