ठोसेबाज आमदाराविरोधात पोलिस कारवाई नाही

ठोसेबाज आमदाराविरोधात
पोलिस कारवाई नाही

मुंबई, ता. १० : शिवसेना आमदार संजय गायकवाड यांनी आकाशवाणी आमदार निवासातील उपाहारगृह कर्मचाऱ्यांना केलेल्या मारहाणप्रकरणी अद्याप पोलिस पातळीवरून कोणतीही कायदेशीर कारवाई झालेली नाही.
संबंधित कर्मचाऱ्यांची तक्रार प्राप्त झालेली नसून तक्रार आल्यानंतर त्याआधारे गुन्हा (एफआयआर) किंवा एनसी (अदखलपात्र) नोंद होऊ शकेल, असे एका वरिष्ठ पोलिस अधिकाऱ्याने सांगितले. दरम्यान, गायकवाड यांनी मारहाण केलेले उपाहारगृह कर्मचारी तक्रार देण्यास उत्सुक नाहीत, अशी माहिती सूत्रांकडून मिळते.

बुलडाण्याचे शिवसेना आमदार गायकवाड यांनी जेवण शिळे असल्याचा आरोप करून आमदार निवासातील दोन कर्मचाऱ्यांना मारहाण केली होती. या प्रसंगाचे व्हिडिओ व्हायरल झाल्यानंतर गायकवाड यांच्याविरोधात टीकेची झोड उठली. गायकवाड यांनी माध्यमांना प्रतिक्रिया देताना आपल्या कृतीचे समर्थन केले होते. दरम्यान, या प्रसंगानंतर उपाहारगृह चालकाचा परवाना अन्न व औषध संचालनालयाने निलंबित केले आहे.