गणेशोत्सवात बेवारस वाहने हटवणार मंगल प्रभात लोढा यांचे आदेश

गणेशोत्सवात बेवारस वाहने हटवणार
मंगलप्रभात लोढा यांचे आदेश
मुंबई, ता. ११ : यंदाच्या गणेशोत्सवात भाविकांना कोणतीही अडचण येऊ नये, या दृष्टीने गणेश आगमन आणि विसर्जन यादरम्यान रस्त्यावरील बेवारस वाहने तसेच बेकायदा पार्किंग केलेल्या वाहनांना हटवून रस्ते मोकळे केले जातील, असे कॅबिनेट मंत्री मंगलप्रभात लोढा यांनी आज जाहीर केले.
लोढा यांच्या अध्यक्षतेखाली महापालिकेच्या डी विभाग कार्यालयात गणेश मंडळांसोबत समन्वय बैठक झाली. त्या वेळी महापालिका उपायुक्त मनीष वळंजू, वरिष्ठ पोलिस अधिकारी, बृहन्मुंबई सार्वजनिक गणेशोत्सव समन्वय समितीचे सचिव गिरीश वालावलकर, तसेच गणेशोत्सव मंडळाचे प्रतिनिधी हजर होते. गणेशोत्सवाला राज्य उत्सवाचा दर्जा मिळाल्याने तो अनोख्या पद्धतीने व दणक्यात साजरा केला जाईल, असे लोढा यांनी या वेळी जाहीर केले. या वेळी लोढा यांनी मंडळाच्या पदाधिकाऱ्यांच्या समस्या जाणून त्यांचे निवारण करण्याचे निर्देश पालिका अधिकाऱ्यांना दिले. दरवर्षीप्रमाणे वन विंडो प्रणालीच्या माध्यमातून मंडळांना परवानगी देण्यास विलंब होऊ नये, असेही त्यांनी पालिका अधिकाऱ्यांना सांगितले. महापालिका, बेस्ट प्रशासन आणि पोलिसांच्या सहकार्याने दक्षिण मुंबईत ताडदेव, वाळकेश्वर, खेतवाडी येथे गणेशोत्सवादरम्यान सजावट केली जाईल. यासाठी स्थानिक पातळीवर समित्याही तयार केल्या जातील. न्यायालयाचे निर्देश तसेच कायदा व सुव्यवस्थेचे पालन करून उत्सव साजरा होईल. भक्तांसाठी पिण्याचे पाणी, स्वच्छता, बसण्याची जागा या सर्व आवश्यक सोयींची पूर्तता केली जाईल, असेही ते म्हणाले.