महिला बचत गटांना प्राधान्य

महिला बचत गटांना प्राधान्य
महापालिकेची २५ टक्के कामे द्यावीत ः प्रवीण दरेकर
मुंबई, ता. ११ : शालेय विद्यार्थ्यांच्या गणवेश शिक्षणाची कामे महिला बचत गट, तसेच सहकारी संस्थांना द्यावीत. महापालिकेच्या चतुर्थ श्रेणी कर्मचाऱ्यांपैकी २५ टक्के कामे महिला मजूर संस्था, बचत गट, बेरोजगार संस्थांना मिळावीत, अशी मागणी विधान परिषदेतील भाजपचे गटनेते प्रवीण दरेकर यांनी आज सभागृहात केली.
मुंबईत बेरोजगारांच्या सेवा संस्था तसेच पाचशेपेक्षा जास्त मजूर संस्था आहेत. महिला सहकारी सेवा संस्था, महिला बचत गट, महिला मंडळ आहेत. यांचे सदस्य महापालिकेत छोटी-मोठी कामे करतात. त्यामुळे त्यांना महापालिकेची २५ टक्के कामे द्यावीत, अशी विनंती दरेकर यांनी केली. तसेच शालेय गणवेश निर्मितीचे काम महिला बचत गट, महिला सहकारी संस्था यांना द्यावे, अशी विनंतीही दरेकर यांनी केली. प्रत्येक जिल्ह्यात, प्रत्येक तालुक्यात महिला संस्था आहेत. शासन शिक्षण खात्याला पैसे पाठवते. त्यामार्फत स्थानिक महिला बचत गटांकडून गणवेश करून घ्यावेत, असेही ते म्हणाले.

कर्मचारी सेवेतून कमी होणार नाहीत
कचरा संकलन आणि परिवहन ही कामे खासगी कंत्राटदारांना देण्याचा निर्णय महापालिकेने घेतल्याबाबत दरेकर यांनी टीका केली. दरम्यान, घनकचऱ्याचे संकलन करणाऱ्या एकाही कर्मचाऱ्याला सेवेतून कमी करणार नाही, असे प्रवीण दरेकर यांच्या लक्षवेधीवर मंत्री उदय सामंत यांनी आज सभागृहात सांगितले.