सायबर फसवणूक झालेल्यांना लुबाडणाऱ्या महाठगास अटक

सायबर फसवणूक झालेल्यांना लुबाडणाऱ्या महाठगास अटक

मुंबई, ता. ११ : सायबर भामट्यांकडून लाखो रुपयांना लुबाडणूक झालेल्यांना मदतीच्या बहाण्याने फसवणाऱ्या महाठगास मुंबई पोलिसांनी पनवेलच्या विचुंबे गावातून अटक केली. अनिल दरेकर असे आरोपीचे नाव आहे. फसवणूक झालेल्या व्यक्तींना दरेकर संपर्क करीत, मी १९३० या सायबर हेल्पलाइनमधून बोलतोय, असे सांगून फसवणूक रक्कम परत मिळवून देईन, असे प्रलोभन दाखवून तक्रारदारांकडून पैसे उकळत असे, अशा प्रकारे त्याने मुंबईसह राज्यातील विविध जिल्ह्यांतील तक्रारदारांना संपर्क साधून पैशांची मागणी केल्याचे स्पष्ट झाले. दरम्यान, काही तक्रारदारांकडून ही बाब सायबर पोलिसांच्या (पश्चिम विभाग) निदर्शनास येताच उपायुक्त पुरुषोत्तम कराड यांच्या मार्गदर्शनाखाली पोलिस पथकाने दरेकरला बेड्या ठोकल्या. आरोपी तक्रारदारांना स्वतःच्या नावासोबत सायबर लीगल ॲन्ड टेक्निकल, गृह मंत्रालय, भारत सरकार असे लिहिलेले ओळखपत्र व्हॉट्सॲपवर पाठवत असे, ते ओळखपत्रही पोलिसांनी जप्त केले आहे. नोंद गुन्हे सीसीटीएनएस प्रणालीद्वारे संबंधित पोलिस घटकाच्या अधिकृत संकेतस्थळावर अपलोड केले जातात. त्यात तक्रारदाराचा जबाब, तपशील आणि संपर्क क्रमांक असतो. तेथूनच दरेकर सायबर फसवणूक झालेल्यांना संपर्क करीत होता, असा संशय पोलिसांना आहे.