लिपिक-टंकलेखक संवर्गाचा निकाल जाहीर

लिपिक-टंकलेखक संवर्गाचा निकाल जाहीर

मुंबई, ता. ११ : महाराष्ट्र लोकसेवा आयोगातर्फे १७ डिसेंबर, २०२३ रोजी मुंबईसह छत्रपती संभाजीनगर, अमरावती, नागपूर, नाशिक व पुणे जिल्हा केंद्रांवर घेण्यात आलेल्या महाराष्ट्र गट-क सेवा मुख्य परीक्षा-२०२३मधील लिपिक-टंकलेखक या संवर्गातील एकूण २७८ नियुक्ती प्राधिकारी कार्यालयांचा अंतिम निकाल जाहीर करण्यात आला आहे. त्यानुसार एकूण ६,५१९ उमेदवार विषयांकित पदाकरिता शिफारसपात्र ठरले आहेत. यामध्ये सोलापूरमधील तन्मय तानाजी कटुळे हे राज्यातून प्रथम आले आहेत. मागासवर्गमधून पुणे जिल्ह्यातील किशोर चंद्रकांत किसवे हे राज्यात प्रथम आले आहेत तर महिला वर्गवारीमधून सांगली जिल्ह्यातील दुर्गा विजयराव गावडे या राज्यात प्रथम आल्या आहेत. अंतिम निकालातील ज्या उमेदवारांना त्यांच्या उत्तरपत्रिकेतील गुणांची पडताळणी करावयाची आहे, अशा उमेदवारांनी गुणपत्रके प्रोफाईलवर पाठविल्याच्या दिनांकापासून १० दिवसांत, आयोगाकडे ऑनलाइन पद्धतीने विहित नमुन्यात अर्ज करणे आवश्यक आहे. या संवर्गाकरिता प्रतीक्षायादी कार्यान्वित राहणार नाही. अधिक माहिती आयोगाच्या संकेतस्थळावर उपलब्ध असल्याचे आयोगाने कळविले आहे.